Ang bag-o niyang Valentina

Sukad sa iyang pag-abot gikan sa Dubai ingon sa wala na siya’y gana nga magsuroysuroy kuyog sa iyang mga higala. Sila si Mama ug Papa niya nakamatikod usab sa kalit nga pag-usab sa batasan sa ilang anak. Kaniadto sa wala pa kini moadto sa Dubai,  istoryador kaayo kini ug hilig kaayo’g suroysuroy sa iyang mga suod nga ig-agaw, apan karon naa na kanunay magmokmok sa balay. Ngano kaha? Unsay hinungdan? Unsay nakaingon sa kalit nga pagkausab sa batasan niini?

“May problema ba, Lanie, sa didto ka pa sa Dubai?” nangutana ang iyang Papa kaniya. Hasta pod ang iyang inahan nabalaka sa iyang pagkahilomon karon.

“Wala man, Pa.”

“Apan, Lanie, anak.”

“Apan, Pa, nganong hatagan man ninyog kahulogan ang akong pagpakahilom. Dili lang ko gusto, Pa, Ma, nga makighugoyhugoy sa higala nako kaniadto. Gusto na lang ko dinhi sa ato...”

“Aw, ikaw god, mao man kaha,” hinay ang tingog ni Mama niya Auring.

Pagka petsa 14 sa Pebrero may mitumaw nga batan-ong lalaki sa ilang balay ni Lanie. Susama pod niyag panuigon. Ug may pagka mestisohon kini ug ambongan ang porma niini sa laktod nga pagka sulti.

“Kumosta ka na, Lanie,” niini pa nga mitupad paglingkod sa dalaga. “Uy, mora’g mihugo ka’g gamay karon, may problema ba?”

“Duna.”

“Du-duna? Unsa may imong problema?”:

“Ikaw...”

“Wala ka nay problema nako, Lanie, kay nia ko, miapas ko nimo gikan sa Dubai aron pangayoon ko sa imong mga ginikanan ang imong mga kamot .Oo, dad-on ko ikaw sa altar sa kaminyoon...” Ug may gikuha si Greg nga usa ka gamay’ng kahon ug unya iyang giablihan. Usa ka mahalong kuwintas.

“Imo na kini,” ni Greg pa. “Ug Happy Valentines...”

“Greg, nagdamgo ba ako, kaingon ko’g dili nimo tumanon ang imong gisaad nako sa didto pa ko sa Dubai. Ug karon, nia ka, ug gusto ka nang makigminyo nako...”

“Oo. Kay kun ako ang mosaad dili gyod mahitabo nga kini akong pakyason, kay ang akong gugma nimo, magpabilin sa tanang panahon, bisan pag moabot ang kaliboan ka mga Valentines Day sa  atong kinabuhi, Lanie, dili gyod malalis nga ikaw ug ako  gipares  na sa Kapalaran. It’s  our Destiny...”

Ug nabati ni Lanie ang awit ni Frank Sinatra nga nag-ulohan og My Funny Valentine ug nagkaanam kini ka lanog sa pandungog ni Lanie ug ingon man kang Greg. (Kataposan)