Goodbye is not Forever
Gula 76
Unsa kahay tinuod nga hinungdan? Nakapangutana si Albert sa iyang kaugalingon. Wala siya masayod kun unsay tubag sa pangutana nga iyang gipasupot sa iyang kaugalingon.
Nianang pagkasunod adlaw, gitinuod gyud ni Vanessa ang iyang gisulti ngadto kang Albert. Milarga siya sa Bicol uban ang iyang amahan. Misakay sila sa unang biyahe sa Cebu Pacific nianang adlawa paingon sa Bicol.
May gililong si Vanessa ngadto kang Albert. Wala niya itug-an ngadto kang Albert ang tinuod nga hinungdan sa ilang paglarga o pag-adto ngadto sa Bicol. Maoy iyang gusto nga dili na lang una sultihan si Albert mahitungod niini. Mao usay gusto ni Mr. Victor Hedalgo, ang iyang amahan. Bisan sa iyang inahan wala magsulti sa tinuod ang amahan ug anak. Sila rang duha si Mr. Hedalgo ang nasayod sa suliran ni Vanessa.
Kun aduna ugod siya’y problema, si Papa Victor gilayon ang sumbongan ni Vanessa. Bayibs kaayo sila. Masinaboton ang iyang amahan. Dili siya moduol sa iyang inahan nga may pagka-maldita. Banhaan o tagawtawan si Mrs. Hedalgo.
Didto sila mag-abot sa balay sa usa nila ka paryente sa Sampaloc St., Manila. Nakugang gani si Daniel, ig-agaw ni Mr. Hedalgo sa ilang paghibutho. Wala kini magdahom nga mahitungha ang amahan ug anak sa ilang pinuy-anan. -- Sumpayan pa
- Latest
