Ang nahabiling buhi

Napuno na ang lifeboat nga gisakyan ni Alexto apan giitsa siya sa dagat sa usa ka piniriso. Kini tungod kay may laing piniriso nga gisagop ug maoy gipuli kaniya. Didto sa pier nianang adlawan pa, “Kapitan Deduso, mas maayong di lang mo karon molarga kay may bagyong umaabot sa Manila,” matud sa coast guard nga nag-inspeksiyon.

“Hinay ra man sir, di man tingali makatarog sa kadako sa among bapor,” mitimang ang master sa kapitan.

“Na hala, kamoy mag-igo basta wa mi labot kun magkinaunsa man gani,” dayong kanaug sa coast guard.

Wala madugay nangabot ang mga  priso nilang mga pasahero nga dad-on sa Muntinlupa. Ang marinerong si Alexto, miduol sa kapitan kay may katupad siyang priso sa teheras.

“Kap, di kaha ni peligro nga niay mga priso natong mga pasahero?”

“Ayaw kabalaka niana,” tubag sa kapitan, “kay may mga guwardiya man sila.

“Kap, unsa man, manlarga ta karon?” misuna ang timonil.

Wala dayon makatubag ang kapitan kay nagdibal ang iyang hunahuna sa kabalaka sa bagyong umaabot ug sa mga pasaherong mga priso. Apan milarga gayud sila nianang orasa.

Duol na sila sa Manila ug kusog na kaayo ang hangin ug ngitngit pa gyud kaayo ang kagabhion. Nabangga sila sa giant tanker nga estranghero ug nabuslot ang bapor ug hinayhinay kining mi-unlod. Paghapak sa hangin, mitakilid ang bapor nga   daghan na kaayong tubig. Nagkagubot na ang mga pasahero ug ang lifeboat napuno dayon sa mga tawo ug usa niini si Alexto.

“Tabang, Tabang! Sa tawo nga mikompayot sa pisi sa lifeboat.

“Puno na, di na mahimo kay malunod ta,” ni Alexto pa.

Apan kalit, sa iyang tupad nga priso, gialsa siya ug gilabay ngadto sa dagat aron sagopon kadtong nagpakitabang nga usa usab diay ka priso.

Buntag na ug linaw na ang dagat sa pag-abot sa mga rescuer sa navy ug Coast Guard.

“Sir, wa man mi laing nakit-ang buhi, gawas ning luya kaayong nagsul-ob og lifejacket,” matud sa usa ka rescuer.

“Hain man diay ang mga lifeboat paingon?”

“Tingali sa kagubot ug sa kalit nga hitabo, nakalimtan pag-release ang lifeboat ug kauban kining mi-unlod sa bapor.

Paggawas ni Alexto sa ospital, iyang nabasa sa mantalaan nga ang bapor miunlod nga nagtangkil pa sa mga lifeboat. (Katapusan)