Tsikboy nga Enforcer

Gula 5

“Lauman nako nga dili nimo ako pakyason Janice,” matud ni Bert dungan sa pagpig-it og hugot sa kamot sa dalaga. Nagtinutokay silang duha ug bisan walay pulong nga migawas sa ilang baba apan daw sa nagsultihanay ang masi’g nila ka mata.

Takulahaw lang nga napawong ang suga sa sinehan kay magsugod na ang pagpasundayag sa love story nga salida nga buot nila tan-awon. “Bitaw, nganong pakyason man tika Bert nga ang tinuod may gitagoan man ‘sab ko nga feelings nganha kanimo,” matud ni Janice.

Wala maglangan og higayon si Bert. Iyang giagbayan si Janice ug gihagkan ang wala nga aping, dayon gipatikan og hawok ang mga ngabil. “Hala, mangalit ka man lang og panghawok uy,” ni Janice pa nga nangusnit sa tiyan ni Bert.

“Sori kaayo Jan, wala g’yud ko makapugong sa akong gibati nga kalipay tungod kay gidawat na nimo ang akong gugma,” matud ni Bert. “Bitaw uy, natural man g’yud na sa mag-sweetheart nga magparayganay apan gipakalitan lang ko nimo,” matud ni Janice nga nagpahiyom. Mitan-aw sila sa mga thriller sa umaabot nga mga pelikula nga ipasundayag sa maong sinehan. Usa sa mga thriller nagpakita og kissing scene. Nabantayan ni Bert nga pwerteng nakatutok ni Janice sa duha ka batan-ong artista nga nagparayganay.

“Pwede ba og mousab ko’g kiss nimo Jan?” hagawhaw ni Bert ngadto ni Janice. Milingi si Janice ngadto ni Bert nga nagpahiyom. Wala madugay nag-ukobay na ang masi’g nila ka mga ngabil, og gigakus dayon ni Bert ang brand new niya nga girlfriend.

Nasabtan ni Bert nga may kasinatian na si Janice sa pagpakigparayganay og lalaki. Dili na kini bakikaw nga mosukol hinagkanay. Lumoy kaayo ang mga ngabil sa dalaga ug nakahatag kini og dugang pa’ng kaikag ni Bert.      

Sa unang higayon nagakus ni Bert ang lumoy usab kaayo nga hawak ni Janice. Nipis kaayo ang gisul-ob ni Janice mao nga sa pamati ni Bert iya na nga nagakus ang dalaga nga mora’g walay sapot.

Giantus lang ni Bert ang kalisud sa iyang kahimtang nga ingon sa nabawog ang iyang lawas tungod sa kahoy nga divider sa lingkoranan samtang naninguha nga iyang magakus pag-ayo si Janice.

Wala na gayud buwagi’g gakus ni Bert si Janice samtang padayon sila nga mitan-aw sa salida. Matag karon ug unya, modalikyat g’yud og kiss si Bert sa nangalimyon sa kahumot niya’ng girlfriend.

Dali ra g’yud kaayo nga “napalambing” ni Bert si Janice ngadto kaniya. Miparayeg na gani kini pinaagi sa pagsandig sa iyang ulo ngadto sa tuo nga abaga ni Bert. - (Sumpayan)