Goodbye is not Forever

Gula 72

Gikuha ni Vanessa ang sabon ug iyang gisabonan ang labing mahinungdanong butang sa iyang pagka-babaye. Ug samtang nagpadayon siya pagsabon niini, milakdop sa iyang hunahuna si Albert. Nakapahiyom siya.

Alang kang Vanessa, si Albert na ang labing expert nga lalaki sa paglipay sa babaye. Iya kining nasuta sa ilang panagbagat sa miaging adlaw. Natagbaw kaayo siya sa performance nga gipakita ug gipatagamtam ni Albert kaniya.

Nalipay kaayo siya sa nahitabo nila ni Albert. Nasayod siya nga dili niya mapanag-iya sa hingpit ang lalaki sanglit aduna na kini Josheba nga sinaaran. Apan bisan sa daklit nga kalipay nga iyang natilawan uban ni Albert, kontento na siya. Puwede na gani siyang mamatay!

Gitibawas ni Vanessa ang pagkaligo. Si Albert ang diha kanunay sa iyang hunahuna.

Pagkatapos sa iyang pagkaligo, migawas si Vanessa sa banyo ug nag-ilis sulod sa iyang lawak. Unya nanaog siya. Wala na lang siya manihapon kay wala pa siya batia og kagutom.

Wala na lang siya mananghid sa iyang mga ginikanan nga siya molakaw na. Migawas siya sa ilang balay ug mipadayugdog paingon sa eskina diin adto siya manakay paingon ngadto sa siyudad. Samtang nagbarog si Vanessa sa daplin sa dalan nga naghulat og kasakyan ug hangtod na didto na siya sa call center, si Albert ra gyud ang diha sa iyang hunahuna. --Sumpayan pa