Goodbye is not Forever - Gula 70

Nakapanglingo si Albert nga naghunahuna niini. Wala siya magtuo nga mosangko sa ingon niini ang mga panghitabo. Kaniadto nabalaka siya nga tingalig matental si Josheba sa laing lalaki didto sa Canada. Apan siya man diay hinuon mismo huyang sa ilang kasabotan. Ug nakapanglingo na usab siya. Gihasol siya sa iyang tanlag.

Sa laing bahin, didto sa pinuy-anan ni Vanessa niadtong higayona, nagpabilin pa nga naghayang sa iyang higdaanan ug gibukotan sa habol ang katunga sa iyang lawas. Nasayod siya nga duna pa siya’y trabaho ug kinahanglan na siyang mobangon. Kaganina rang nagmata si Vanessa apan wala siya ganahing mibangon. Gusto pa siyang mohigda. Mao nga nagpabilin una siya sa ibabaw sa iyang kama. Nagpiyong ang iyang mga mata apan sa matag karon ug unya mokipatkipat timailhan nga abli ang iyang galamhan. Naghanduraw siya sa kalalim sa ilang pagpinarayganay ni Albert. Buot niyang busgon ang iyang hunahuna sa katam-is sa ilang panag romansa ni Albert. Ingon sa mabuang ni Vanessa sa kalalim sa gibuhat ni Albert kaniya.

He’s a perfect gentleman, nakaingon siya sa hilom nga nagdayeg sa ulitawo. Alang kaniya, one hundred percent ang performance ni Albert sa ibabaw sa kama.

Mitakilid si Vanessa sa dapit sa tuo ug gihugtan paggakos ang mahunolhunol nga unlan. -- Sumpayan pa