Depekto

Nakapanghupaw ning sayong kahaponon si Wenda samtang nagtutok sa iyang selpon. Duha ka adlaw na siyang naghuwat sa tubag ni Aida iyang maid, sa teks sa nauna. Nipauli si Aida sa ila sa petsa kinse ka day off niya. Petsa 15 ug petsa 30 man iyang day off kada bulan.

Petsa 18 na ron, wa pa nibalik og trabaho si Aida. Nakaingon si Wenda sa kaugalingon nga nangluod na si Aida ug di na tingale mobalik. Gibasa niya’g balik sa selpon ang mensahe niya sa iyang maid:

Pagsulti lang kun di kana moserbisyo nako. Wa may pinugsanay. Kay maayo imong pagsulod sa amo. Maayo sab unta ang paggawas.” Naglingkod si Wenda sa sopa sa ilang sala. Nipahuway siya’g kadiyot. Namahid sa iyang singot. Siya nay nangunay sa pagpanglaba.

Pero hilom siya nga nangaliya nga unta mobalik si Aida sa pagserbisyo sa ila. Kay lisod na karon ang pagpangita og maid nga tarong o kasaligan.

Makasab-an man usahay niya si Aida sa ginagmay’ng sipyat. Di man motokol. Unya maminaw man kun korehian. Hapit na siya usa ka tuig sa serbisyo. Unya pag-abot ni Yul iyang bayaw, ulitawong manghod ni Marlon kapikas ni Wenda, nagsugod ilang problema. Kay grabe mangasaba og maid si Yul.

Bisa’g dugay na sa siyudad, probinsiyana gihapon og lihok ug sinultihan si Aida. Dinhi na siya naminyo ug nabiyuda. Nangapo na siya. Apan may duha pa siya ka anak nga nagtungha pag hayskul. Maoy kanunay nga nagsalig niya. Daghan gyud hinoon og apan si Aida. Pero maagwanta ra ni Wenda. Tabian si Aida. Maong dili usahay makasabot sa sugo kay maglabi iyang tabi.

Badlongon lang gyud ni Wenda sa pag-ingon “Hilom una! Paminaw!” Moapil usahay siyas istorya sa amo  ug bisita.

Badlongon na lang sab. Usahay di lang tinggan. Kun wa nay trabahoon, unya moapil siya’g tan-aw sa TV, sabaan kaayo. Kun unsay iyang makita sa salida, isulti niya’s ubang nanan-aw. Bisag puro sila makakita.

Loyo sa mga depekto ni Aida, duna siya’y mga kinaiyang dalaygon. Matinahuron siya. Mapinanggaon sa duha ka mga anak nilang Wenda ug Marlon. Si Fiona naas grade one. Si Lovie naas kindergarten. Moalsa si Aida og bug-at. Mopas-an og tangke sa LPG kun mabasiyo ug siya ang mopalit sa bag-ong sinudlan. Masugo siya bisa’g asa. Wa siya’y asyos sa trabaho. Dili siya dilikada sa higdaanan. Tungod sa kagamay sa lugar sa balay ni Wenda, sa kusina lang mohigda si Aida. Way reklamo. Maningkamot siyang mosubay sa polisiya sa iyang amo. Ug ang pinakanindot sa tanan, dili siya kawatan. Duha ka maid ang nangagi ni Wenda nga gitaktak niya.

Nasiklapan ni Wenda sa bintana nga may nagdangadanga padulong sa ilang gate. Naaninaw niya nga si Aida. Nidali siya’g kanaug aron pag-abli sa gate.

“Maam, nianhi ko aron mananghid nga di na lang ko motrabaho,” ni Aida dihang gipadayon na siya sa sala. Naghilak.

Sila rang duha sa balay karon kay si Yul nikuyog sa barkada. Ang mga bata tua sa eskuylahan. Ug si Marlon nga tigkuha sa mga bata, tua pas iyang opisina nga Accounting Firm.

“Ngano man?” ni Wenda. Naisang kilay. “Gibinaboy ko’g kasaba ni Yul sa petsa 14. Gipasanginlan kong nangawat og posporo. Dako kaayo akong kahiubos anang Yul,” ni Aida. Nidanguyngoy.

“Kun kana lang imong ikahiubsan, puwede man namo papahawaon si Yul. Gipinahan na siyang Marlon nga di manghilabot sa maid. Wa nay igsoon nipasaka anang tawhana tungod sa kangil-ad sa batasan. Nadiindiin na nag panarbaho. Unya di magdugay. Tungod kay perfectionist. Mangita’g sayop sa manedyer ug kauban sa trabaho,” ni Wenda.

“Gusto pa man unta kong moalagad ninyo. Apan di makaog iro ang sinultihan ni Yul,” ni Aida.

“Huwata lang si Marlon. Aron masayod ka unsay iyang buhaton anang Yul,” ni Wenda.

“Basi’g unsaon unya ko ni Yul. Abi pa lang nagpahaba ko ninyo,” ni Aida.

“Ay’g kahadlok. Para nako way tawong perpekto. Ang imong depekto maagwanta ra nako. Apan ang depekto anang Yul nga siya mismo wa nasayud, maoy dili nako matolon,” ni Wenda.

“Sige maam. Mohuwat na lang ko,” ni Aida. Namahid sa luha. Nahimuot kaayo si Wenda. “Sige pag-snack diha. Aron tiwason nimo tong gisugdan nakong labhanan,” ni Wenda.

“Kaluoy ni maam. Nangunay na lang og panglaba,” ni Aida nga nilakang dayon ngadto’s kusina. (Katapusan)