Goodbye is not Forever

Gula 69

Nagdali si Albert pag-open sa iyang computer aron tan-awon kun duna ba siya’y mga email. Ug wala gyud siya masayop, nag-email na usab si Josheba.

Taas kaayo ang mensahe sa iyang hinigugma. Nag-umog kini sa tuman nga kamingaw. Tugob sa mga paukyab sa gugma. Sa mga pulong nga gilambod sa tim-os nga pagbati. May picture pa ang dalaga nga gi-attached sa email nga gikahinangop usab pag-ayo ni Albert.

Human mabasa ang email sa hinigugma, samtang nagtutok siya sa picture ni Josheba, wala lang tuyoa, gihagkan kini ni Albert. Buot niya nga ipabati bisan sa picture ni Josheba ang gibati niyang kamingaw ngadto sa babaye.

Unya kalit mibadhas sa iyang hunahuna si Vanessa. Unya si Josheba. Unya si Vanessa na usab. Unya si Josheba na usab. Magbanosbanos ang duha pagsulod sa iyang hunahuna. Matahom si Josheba ingon usab si Vanessa. Nahigugma siya kang Josheba, segurado siya sa iyang kaugalingon mahitungod niini. Kang Vanessa? Ambot kun nahigugma ba siya sa dalaga. Ang iyang nahibaloan mao nga naibog siya niini. Nadani siya sa katahom ug kaparaygon niini kaniya. Ang iyang kamingaw ug kahidlaw kang Josheba iyang gipahungaw ngadto kang Vanessa. Ang iyang gibuhat maoy pagpalabay lang sa kalaay samtang si Josheba atua pa sa Canada.

Nahasol si Albert sa iyang nabuhat. Nakasala siya sa ilang relasyon ni Josheba. Dakong sala ang iyang nabuhat. -- Sumpayan pa