Facebook addict

Di na lang gyud diay ta kasulti sa atong anak mahitungod sa atong reklamo? Gusto man kaha ta nga malinawon ug malipayon atong panag-uban dinhi sa atong balay?” ni Andy ngadto ni Betty iyang kapikas.

Nag-atubang sila’s talad kan-anan aron mamahaw. Naa nay fried rice, corn beef ug scrambled egg sa lamesa. Sayong nanglakaw karong buntaga ug unang namahaw ilang bugtong anak nga si Chona ug iyang bana nga si Dante. Duna sila’y masteral class nga gitambongan karong adlawa.

Tibuok adlaw ilang klase matag Domingo. Kay gusto silang ma-promote sa ilang trabaho isip magtutudlo sa saring publiko. Wala pa nakamata si Edna, dos anyos nilang anak, apo sa managtiayong Andy-Betty.

Retirado nga mga magtutudlo sa saring publiko sila si Andy ug Betty. Pension na lang ilang gisaligan. Unya, duna nay gimintin nga mga tambal kay puro sila diabetic. Sa ila lang panginahanglan, kulangon na hapit ilang binulan nga pension. Unya, ilang anak ug ang bana niini nga nangipon sa ilang balay, way hunahuna sa pagtampo sa mga gastohan. Ang ilang suweldo, ila ra. Kay grabe silang momintinar sa ilang postora. Mahalon ilang mga gamit sama sa mga sapot, pahumot ug uban pa. Labi na gyud ang sa panghindik ni Chona.

Sila na’s Andy ug Betty ang makapalit og gatas, diaper, pagkaon ug ubang panginahanglan ni Edna. Libre pa sila’g yaya sa bata. Gawas sa mahago ang yaya (ang lola nga si Betty), makagasto pa gyud kun unsay pangayoon sa bata. Wa gyu’y natampo sa gastohan sa panimalay ilang anak ug ang bana niini. Maong kanunay magbagulbol si Andy.

Wa pa gyu’y panahon si Chona ug Dante sa ilang anak. Kay inig abot nila’s balay, mag-iyahay og higda sa sopa. Maglumba og pindot sa ilang mga selpon, sa ilang facebook. Magsige sila’g palitrato sa ilang postora ug ipakita ug ipasundayag sa ilang mga higala sa facebook. Mingawon unta ang bata nila. Apan sila, dili. Tibuok adlaw ang bata naa’s apohan, kada-adlaw. Wa sila’y panahon sa bata. Unya kun motiyabaw kay moparayeg sa inahan, sagpaon lang dayon sa inahan. Sila pay moreklamo nga ang bata di na moduol nila.

Bata nga way buot, tudloan nila’g paampo panahon sa Angelus. Unya kun moingon ang bata “dili ko” sagpaon sa inahan. Unsa man nang matanga sa pag-ampo? Nga i-angin man ang batang way buot.

“Facebook addict!” Mao ni termino nga gigamit ni Andy batok sa iyang anak. Di lang motingog si Betty.

“Abi nako’g drugs, alcohol o sigarilyo ray makaadik. Hasta sab diay ang facebook. Abnormal na sa tawo nga way laing trabaho kun di atubang sa facebook, kun naa sa balay. Di katabang sa mga bulohaton! Moundang la’g mokaon!” ni Andy sa iyang pagbagulbol kun sila rang duha ni Betty ang magkahinabi.

“Kun moreklamo ka, ikaw ang mahimong dautan. Om-oma na lang na tanan!” ni Betty.

Mao ni kanunay’ng itubag niya’s iyang bana.

“Nakabantay ka’s mga salida sa sine, TV ug drama sa radio?” ni Andy. Nawad-an og gana mokaon.

“Unsa may kalabotan ana sa atong problema?” ni Betty. Nihiwa ginamit ang kutsara ug tipik sa scrambled egg. Gibutang sa iyang pinggan.

“Prangka kaayo ang mga dialogue. Dili tinuod nga hitabo apan tinuod kaayo ilang gipanulti. Kun di sila ganahan sa tawo nga mobisita nila, ingnon gyud nila ‘di ko gusto kakita sa imong nawong.’ Pahawa! Kita, daghan pang likoliko. Ang ato ra gyung masulti, ‘nganong nia man ka?” ni Andy.

“Maayo man nang salida o sugilanon kay gaagad ra man sa direktor o tagsulat. Pero ang tinuod kinabuhi, lahi. Kun di ka gusto’g kaaway sulod sa imo mismong panimalay, hilom na lang!” ni Betty. Nitutok pag-ayo sa iyang bana. Nihukad og fried rice sa iyang bahawan.

Nidimdim og kape sa iyang tasa si Andy. Nitindog. Gidala ang tasa sa kape ngadto sa sala. Nipunit og remote control ug nipasalida og TV. Nakasabot siya nga di gusto ni Betty nga hisgutan ilang problema. Way solusyon ilang problema. Kay way muangkon nga dunay problema. Mao na ang tinuod kinabuhi. Ang sa salida dali rang masulbad kay gaagad lang sa tagsulat o director. (Kataposan)