Matam-is ang Paghandom

Gula 7

Tugob sa katam-is ang pagparayganay nila ni Ely ug Shen sulod sa mabugnaw’ng lawak. Daw usa lang gihapon ka dalaga nga mora’g wala mahilabti si Shen kay bisan og nakapanganak na, nagpabilin ang kurba sa iyang lawas.

Gitagbaw nila ni Shen ug Ely ang kamingaw nga ilang gibati sa mga adlaw nga wala sila magkita. “Wala ko magtoo nga magkakita pa kita Shen,” matud ni Ely. “Magpasalamat g’yud ko ni Allah nga gitagbo pa niya ang atong mga dalan pag-usab,” ni Shen.

Mikalit lang kamingaw ang lawak apan padayon ang nagkainit nila nga pagparayganay. “I love you Ely, I love you,” matud ni Shen nga daw usa ka isdang kumi nga mipilit kang Ely. Nakasugnib pa kini og dugang kainit kang Ely.

Milanat g’yud og mga dul-an sa oras ang ilang pagparayganay. “Unsay imong plano kanatong duha Ly?” gisukna ni Shen ang reporter. “Wala ko masayud, minyo na man gud ko,” dali nga tubag ni Ely.

“Wala’y problema nako nga duna kay asawa kay ang akong amahan bitaw, tulo ang asawa. Ang nakaapan lang kay usa ikaw ka Kristyano ug wala itugot kaninyo nga dunay laing asawa,” matud ni Shen. Naghinuktok si Ely, ingon sa naglisud pagsulbad sa maong problema. “Sagdi na lang Ely, ayaw na hasula ang imong kaugalingon, andam ko nga mag-antus. Tingali kun ampingan nimo ang akong hulagway nga anaa kanimo, dili ka makalimot kanako,” ni Shen pa nga nagduko.

Nasabtan ni Ely nga kahilakon si Shen. Iya kining giagbayan ug giam-aman. Giparaygan. Gibuhian ni Ely ang usa ka halawom nga pagpanghupaw.

“Tana Ly, gabii na, mopauli na ko,” ni Shen pa. Gihatud ni Ely si Shen didto sa Urgello apan wala na siya manaug pa sa taksi. Gipatikan ni Ely og usa ka hawok si Shen sa dayon na niining kanaug sa taksi.

Nagpahatud si Ely sa ilang balay. Wala tuyoa, gitugtog sa radyo nga gimonitor sa taksi ang kanta nga Love Hurts. Daw gikumot ang kasing-kasing ni Ely nga namati sa mga pulong sa awit.

Gipiyong niya ang iyang mga mata. “Dia na ta sir,” matud sa taksi drayber nga mipikpik ni Ely. Huyhoy  ang abaga ni Ely nga nanaug sa taksi. Nagduha-duha si Ely kun muadto ba gihapon siya karong adlawa sa dapit nga didto sila unang nagkita si Shen. Alang kang Ely, usa ka matam-is nga kaagi sa gugma ang kasinatian nila ni Shen, apan masakit ang paghandom nga dili na niya kini maangkon sa hingpit. (Kataposan)