Mar Roxas gisaway

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Kining kaso nga gipayil ni anhing bise gobernador Greg Sanchez batok sa suspendidong Gobernador Gwen Garcia nasang-at ngadto sa hukmanan niadtong 2010 pa. Dugay na. Pagkamatay ni Sanchez gipadayon sa iyang anak sa tuig 2011. Taudtaod na sab. Gikan sa Ombudsman naabot kini sa lamesa ni anhing Department of Interior Local Government (DILG) Secretary Robredo. Didto kini mapending, sumala pa sa gipalakaw nga estorya, sa mipuling Mar Roxas. Napundo ang maong kaso sulod sa taastaas nga panahon, diin may rekomendasyon nang silot nga giandam si anhing Robredo. Kuno!

Sa balaud bahin niining kasoha, human sa makuting imbestigasyon, kinahanglang may desisyon dayon nga ipagawas ang korte sulod sa 60 ka adlaw, matud pa ni Kongresman Pabling Garcia. Buwahan, kun masuspenso man ang tagtungod, ma-served dayon. Butang nga dili mao ang nahitabo.

Kining pagpagawas sa suspension order ni Gwen nga gikan sa Malakanyang pinaagi sa hugot nga paninguha ni Roxas, diin gitumong gyud sa Pasko, Bag-ong Tuig, Sinulog ug mga Adlaw sa pagpangampanya, usa kini ka linuog nga buhat ug dili tawhanon. Nakasamad kini sa kasingkasing sa kinatibuk-ang banay sa mga Garcia, sa liboan niyang dumadapig ug sa mga relihiyosong binuhat kinsa nakaila unsay Ginoo?

Kun ugaling tinuod man nga nakasala si Gwen, nganong wala man nila ipakanaog ang hukom sa tukma ug dili kontrobersyal nga panahon? Nganong gitumong man gyud ning panahon nga dapat si Gwen malipayon nga mohatag og pinaskohan sa mga dancing inmates nga iyang gipasikat sa tibuok kalibotan? Ning panahon sa Bag-ong Tuig, nga kinahanglang gawasnon unta ang hunahuna ni Gwen nga mosugat sa Bag-ong Kahayag? Ug ning panahon sa Sinulog, diin sanag unta ang nawong sa gobernadora nga mosalmot sa pagsayaw-ampo sa kadalanan gikan sa Kapitolyo hangtod ngadto sa Cebu City Sports Complex? Husto ba kining gibuhat ni Roxas? Mao ba kini ang iyang gipasiatab nga way bulok sa politika?

Kun may respeto pa si Mar ni Gwen isip politiko sama niya, nindot unta’g gisayo pa paghatag ang suspension order dapat 6 ka bulan sa dili pa mag-Pasko. At least, dili unta sirkulohan sa mga armadong militar ug mga pulis ang Kapitolyo nga maoy nakaguba sa matahom nga panagway sa Pasko, Bag-ong Tuig ug Sinulog sa tibuok dakbayan. Ning gipakitang taras ni Mar Roxas, daghan ang nakasaway kaniya.