Honey

Honeyyyy???” Naiknat ang kilay ni Irene pagkadungog sa maong pulong gikan ni Nestor, iyang bag-ong uyab samtang nangape sila sa Starbucks.

“Yes, Irene, mao nay gusto kong gamiton kada matag sangpit nato sa usa’g-usa.” Dugang padayag sa lalake nga naggunit sa usa ka basong kape.

Gustong supakon kini ni Irene. May puybya na siya niining pulonga. Oo, gikahadlokan na kaayo niya kining pulonga. Ngano?

Tulo na ka uyab ang miagi sa iyang dughan, kinsa mi-usar ining pulong ‘Honey’. Ug ilang relasyon wala molungtad og dugay.

“No! Gusto ko ‘Honey’.” Pintok nga tubag ni Nestor. “Abi nimo, Hon, wa sa maong pulong ang demalas. Mga palakero lang gyod ug dukirok sa babaye kadtong mga boyfriend mo kanhi, kinaiya nga maoy nakapaguba sa inyong relasyon sanglit ‘reserved type’ ka man. Sila gustong mohilabot nimo, pero ikaw, dili! Ang tinuod nga gugma, Irene, di mamatay. Agi’g hagit sa imong gikahadlokan, imatuod ko nimo nga ang pulong ‘Honey’ di makabungkag og relasiyon; kun dili, makapalig-on nuon pagsamot. Promise!”

Way nahimo si Irene. Giluom na lang niya ang kahadlok. Maoy gipuli ang tam-is nga pasalig sa iyang hinigugmang puno sa prinsipyo sa kinabuhi. Tuod man, pagpanglabay sa mga katuigan...

Nagkahinog ang nindot nilang pagminahalay. Lunlon malipayon ang mga gutlo sa ilang panag-uban. Gisuwerte sila sa panrabaho kay pulos dagkong kompaniya maoy ilang nahuptan. Nag-abli sila’g joint account sa banko. Daghan na kaayo ilang natigom. Busa, nakahukom silang Nestor ug Irene nga magpakasal na.

“You see, Honey? Karon, na-proved na gyod nako nga ang pulong ‘Honey’ di maoy nagdalag demalas.” Pasiatab ni Nestor ngadtong Irene human nila madepositohig half million pesos ang Most Expensive Hotel, diin adto ipahigayon ang reception. Next week, kaslon na ta. And it will seal off all of your fears coz definitely, we’ll become husband and wife before the altar of the Almighty.”

Mitaob ang pahiyom sa panagway ni Irene ug miingon: “Yes, Honey. Now, I believe in you. Husto ka. Di diay demalas ang pulong ‘Honey’.  Ug salamat sa pagpalig-on mo sa akong kahuyang, Honey!”

Ug miabot ang adlaw sa ilang kasal. Alas 10:00 sa buntag ang iskedyul. Apan mi-10:30a.m. na lang, wala gihapon moabot si Nestor sa simbahan. Nahingawa si Irene sa maong kahimtang. Samot kay nangita ang pari kun hain na ang pamanhonon?

Daw gigisa sa kakulba ang dughan sa pangasaw-onon.

“Hain na ba si Nestor? Hain na ba ang iyang Honey?”

Unya, kalit lang may nagdaling kotse nga mihunong sa may baba sa simbahan. Napalingi ang tanan dihang nakita kinsay nanaog -- ang igsoon ni Nestor kang kansang jusi (polo barong) nabulit sa lab-as nga dugo. Deretso kining miduol ni Irene ug mipahibalo: “Dili na makaanhi si Kuya Nestor, Day Irene. Dili na...”

Naputol ang gisulti sa batan-ong tisoy. Kay mga hingos man sa kaguol maoy gisumpay niini. Pero, naninguha sa pagpadayog tabi: “Napusilan siya sa wa mailhing duha ka tawong nagmotor ug maayong pagkaigo sa agtang. Gidali namo’g dala sa ospital. Apan DOA na siya pag-abot namo didto.

Mingiob ang panan-aw ni Irene pagkadungog sa maong balita. Nagisi ang iyang kasingkasing nga daw gihiwa niadtong usa ka pulong nga iya na pong nahinumdoman -- ang pulong ‘Honey’. (Kataposan)