Matam-is ang Paghandom - Gula 6

Mibathay sa panagway ni Shen ang kahimuot dihang nakita niya ang iyang hulagway nga gibutang ni Ely sa ID plastic case nga gibitay sa dughan sa reporter.

Nahinumdom si Shen nga ang maong hulagway gipangayo ni Ely dihang bag-o pa sila nga nagkasuod kaniadto. Wala magtoo si Shen nga ampingan ni Ely ang maong hulagway.

Tungod sa hilabihang kalipay, nadala si Shen sa iyang pagbati ug bisan og diha sila daplin sa karsada nakaparayeg siya ni Ely.

“Bay, ayaw na’g biyai si Shen, mag-una na lang ko nimo kay dili man ta makarga sa motor,” matud sa iyang higala nga si Philipp. Igo lang miyango si Ely ngadto sa iyang amigo samtang gipikpik niya ang buko-buko ni Shen nga miumod sa iyang nawong sa dughan sa reporter.

“Asa ka nag-estar karon Shen, tua ba gihapon sa Urgelio?” gipangutana ni Ely ang namingawan niyang girlfriend. Miyango si Shen. “Mihangyo lang ko nga moestar sa boarding house og pila ka adlaw.”

Mga motorista nga miagi sa maong dapit molingi gayud kanila ni Ely ug Shen nga nagparayganay daplin sa karsada, ang dapit nga didto sila unang nagkita atul sa Sinulog grand parade sa miaging tuig.

“Gusto unta ko nga magka-estorya ta og maayo kay gimingaw ‘sab ko nimo apan dili maayo nga moadto ko sa imong gipuy-an kay makit-an unya ko sa imong mga kadugo,” pasabot ni Ely.

“Unya asa ang gusto nimo nga mag-estorya ta,” may kaparaygon ang tingog ni Shen. Gipara ni Ely ang nagsingabot nga taksi. Nagtupad sila sa paglingkod sa luyo nga lingkoranan.

Gihunghongan ni Ely ang drayber kun asa sila mopaingon. Tuod, mipasirit dayon pagpadagan ang taksi drayber paingon sa usa ka mabugnaw’ng dapit duol sa City Health.

Dali ra sila nga miabot. “Unsa na man ‘sab ning imong gidad-an nako Ly, mosamot kadaku ang akong sala ani,” matud ni Shen. Wala motubay si Ely ug giagbayan niya si Shen pagsulod sa usa ka kwarto.

“Maayo dinhi Shen kay magkasultihanay g’yud ta’g maayo,” giingnan ni Ely ang dalaga. Gitug-anan ni Shen si Ely nga nanganak g’yud diay siya sa ilang liwat ni Ely.

“Nasuko ang akong mga kadugo sa nahitabo ug gani, dunay mihulga nga ila ka nga panimaslan apan akong gipasabot nga apil ko nga sad-an mao nga nangayo ko kanila og pasaylo,” saysay ni Shen.

Giparaygan ni Ely ang gikamingawan niya nga girlfriend. Nasabtan usab ni Ely nga gimingaw kaniya si Shen kay hugot kaayo kini nga mibawos sa pagakus kaniya. (Sumpayan)