Matam-is ang paghandom

Mainampingon nga gigunitan ni Ely ug gitutokan pag-ayo ang panagway ni Shen nga diha sa hulagway.

Gihandom niya kadtong matam-is nga mga gutlo nga gidimdim niya ang katam-is sa iyang girlfriend atul nga kusug kaayo ang pagbunok sa uwan didto sa iyang apartment.

Sa hilom nangindahay si Ely nga unta ikahimamat pa niya pag-usab si Shen. Apan nasayud siya nga imposible na kini nga mahitabo pa kay miuli na si Shen sa Tawi-tawi ug dili na gayud kini tugotan pa sa iyang mga ginikanan nga makabalik sa Sugbo.

Haum gayud kaayo ang gidak-on sa hulagway ni Shen sa gidak-on sa Sinulog ID nga giisyu sa City Hall aron gamiton sa Sinulog Grand Parade.

Gipasok ni Ely ang hulagway ni Shen sa plastic ID holder sa luyo sa Sinulog ID. Gusto niya nga bisan sa hulagway na lang, iyang ikauban si Shen niining susama nga kalihukan nga sila nagkaila sa miaging tuig.

Nagkaduol na gayud ang pagpahigayon sa Sinulog Grand Parade. Gisugo si Ely sa ilang direktor nga sutaon ang rota nga agian sa parada kun nakuha na ba ang mga campaign posters sa mga kandidato.

Gimando sa mayor nga panangtangon sa parade route ang mga propaganda materials sa mga kandidato kay supak si Mayor Mike Rama nga gamiton ang kalihukan sa ilang pamolitika.

Miangkas si Ely sa motorsiklo ni Philipp dihang gisuhid nila ang rota nga adto moagi ang mga mosalmot sa Sinulog Grand Parade karong Domingo.

“Diin kamo magkakita si Shen bay Ely? Dinhi sa Imus?” nakapangutana si Philipp sa iyang higala dihang hinay sila nga nagsubay sa Imus Road paglapas nila sa eskena Sikatuna.

“Diha atbang sa DepEd,” matud ni Ely. May isulti pa unta siya, apan nalantawan niya nga may babaye nga nagtindog daplin sa karsada atubangan sa DepEd building.

Gikulbaan si Ely kay susama gayud kini og bayhon ni Shen. Ang barug, ang buhok, wala gayo’y kalainan. Pwerteng pagkuba-kuba sa dughan ni Ely nga naghuwat nga molingi ang babaye kanila ni Philipp nga naghunong na duol sa nahimutangan sa babaye.

“Shen! Ikaw g’yud diay!” dali kaayo nga mikanaug sa motorsiklo si Ely dihang iyang nasiguro nga si Shen g’yud ang babaye nga iyang nakita.

“Dia ka lagi Ly, nganong dia ka?” nangutana si Shen. “Ako ang mangutana kanimo Shen, nganong dia ka karon?” nagpusot-pusot ang pangutana ni Ely sa namingawan niyang girlfriend.

Gipakita niya kang Shen ang luyo nga bahin sa Sinulog ID nga iyang gisul-ob diin didto ang hulagway ni Shen. “Pagmatuod kini nga gimingaw ko kanimo Shen.” (Sumpayan)