Matam-is ang Paghandom Gula 3

Gihatud ni Philipp si Shenna didto sa iyang apartment sa Urgello dili layo sa usa ka unibersidad. Apan wala magdugay si Philipp kay pag-abot niya dunay mga lalaki nga sa iyang tan-aw dili mga Kristyanos nga misugat ni Shen.

Gitug-an ni Philipp kang Ely ang iyang nasaksihan dihang nagkita sila pagkataud-taud sa ilang miting uban nilang Cris ug Allan. “Mora’g gaduda g’yud ko bay Ely nga lahi og tinuohan kana si Shen. Pagbantay kay basin og mapatyan ka sa ilang kadugo,” matud ni Philipp.

Mitubay usab si Allan ug Cris sa pagpasabot ngadto sa ilang higala nga lisud kaayo ang pagpakigrelasyon sa mga dili Kristyanos kay ang ilang kadugo masuko. Gibati og gamay’ng kakulba si Ely kay may nahitabo na ra ba kanila ni Shen.

“Diha g’yuy usa ka dili Kristyanos kaniadto nga gipanguyaban sa iyang klasmet nga Kristyano, unya gipabuntisan, gibinlan na lang og gamay’ng kinabuhi sa mga kadugo sa babaye uy,” matud ni Allan, ang edaran kanila’ng upat.

Pagka-ugma, mihapit na usab si Shen sa gitrabahoan ni Ely nga diha ra duol sa dalan Colon. Wala dayon niya diritso nga gihatud si Shen sa iyang apartment. Duna siya’y paagi nga nahuna-hunaan.

Mihapit sila sa usa ka kan-anan nga anaa ra sa aseras ug mi-order si Ely og pork chop, chorizo ug pork barbecue nga maoy ilang sud-an. “Chicken la’y ako ha kay duna unya’y makakita nako nga mokaon ana nga sud-an,” ni Shen pa.

Karon nakabantay na g’yud si Ely kun unsa ang tinuohan ni Shenna. “Muslim ka diay Shen?” wala na magliko-liko pa si Ely. Mitutok kaniya si Shen ug taud-taud, miyango-yango ang dalaga.

Nakapanglingi si Ely sa iyang palibot kay nahinumdom siya sa gisulti kaniya nila ni Allan ug Cris nga kuyaw ang Kristyanos kun manguyab og Muslim. Wala na mahimutang sa kaugalingon si Ely.

“Dili ka mailhan nga Muslim no kay wala ka man magtabon sa imong ulo og nipis nga panapton,” matud ni Ely sa tingog nga maguwang lang sa hagawhaw dihang nagsakay na sila og jeep paingon sa Urgello.

Wala motingog si Shen. Taud-taud gigunitan ni Shen ang kamot ni Ely. “Bitaw, kasuk-an g’yud ko sa akong mga kadugo kun masayud nga nakigrelasyon ko og Kristyano.”

Si Shen na lang ang misulod sa apartment, nanamilit lang dayon si Ely ug mitalikud. Gikuyawan si Ely nga mahitabo kaniya ang giingon nila ni Allan ug Cris nga sa una, didto gihapon sa Urgello, gitabangan og kulata kadtong Kristyano nga nanguyab og Muslim. (Sumpayan)