Matam-is ang paghandom

Samtang nagsingabut ang adlaw sa pagpahigayon sa Sinulog grand parade karong Domingo, wala makalikay si Ely sa paghandom sa iyang kaagi sa miaging tuig.

Buntag pa ganing sayo misuroy na siya sa rota nga agian sa Sinulog grand parade. Usahay, mopahuway si Ely sa daplin sa karsada samtang mag-obserbar sa kalihukan, labaw sa tanan abtik ang iyang mga mata.

Dali ra kaayo nga nasiplatan ni Ely ang usa ka gwapa nga babaye nga nagtindog didto sa daplin luyo sa gikutay nga pisi nga gigunitan sa mga tinun-an nga kabahin sa crowd control team.

Gituparan ni Ely ang babaye. Nakabantay si Ely nga nag-inusara lang ang maong babaye. “Alegre kaayo didto sa unahan kay tua didto ang float sa IPI nga mora g’yud og tinuod, molihok,” nagpadungog-dungog si Ely.

Wala mosipyat kay mikubit ang babaye. “Asa dapit?” nangutana kaniya ang babaye. “Duol sa University of San Carlos,” mubo nga tubag ni Ely nga nagngisi.

“Lisud pag-adto didto, maayo ka kay duna ka may ID sa Sinulog. Asa diay ka mangayo ana?” matud sa babaye ngadto ni Ely. “Gusto ka? Diay usa nako ka Sinulog ID, imo na ni.”

Gikan niadto, sila na si Ely ug ang babaye nga si Shenna maoy nagkuyog-kuyog. Wala na g’yud mobuwag si Shenna kang Ely hangtud na lang migabii na.

Nag-uban pa gani sila pagtan-aw sa fireworks human sa Sinulog parade ug nanuroy pa sa Fuente Osmeña diin dunay gipahigayon nga kalingawan.

Pagka-ugma, mitan-aw pa gayud sila si Ely ug Shenna sa subli nga pagpasundayag sa mga mananaug sa Sinulog dance contest didto sa Cebu City Sports Center.

Sinugdanan kadto sa panagsuod nila ni Shenna ug Ely. Kanunay na nga mag-adtoan si Ely sa apartment ni Shenna sa Urgello sanglit si Shenna nagtungha man pagka nurse sa duol nga tunghaan.

Wala tuyoa nga nadala g’yud si Shenna sa hikap-hikap ni Ely kaniya. Mora’g gisundog ni Ely ang sagad buhaton ngadto sa usa ka baktin nga kun imong igad-igaran, takulahaw lang kini nga mohigda.

Samtang nagkaduol na ang pagpahigayon sa Sinulog grand parade karong Domingo, wala tuyoa nga nahandom ni Ely si Shenna. Sa iyang bana-bana, karong mga adlawa daku na ang ilang anak.

Giutingkay ni Ely ang iyang drawer sa opisina kay nahinumdom siya nga may gitipigan siya nga hulagway ni Shenna. Gusto niya nga lab-ason sa iyang kaisipan ang ilang kaagi. Wala mosipyat si Ely. Nakit-an niya ang hulagway ni Shenna nga gipasalip-itan niya sa iyang libro dihang mikuha pa siya sa Mass Communications. (Sumpayan)