Swerte sa Bukid Gula 7

Ingon sa wala mahimutang si Ruel tungod sa subsob nga pagkuba-kuba sa iyang dughan. “Naunsa ka ba nga mora ka man og nangurog?” giingnan ni Sandra si Ruel nga kaganina ra niya nga nabantayan nga mora’g wala sa kondisyon.

“Bitaw Sand, mora ko’g nangurog. Naunsa man ko uy, mora man hinoon ko’g nabayot nga nakauban ko ikaw dinhi,” matud ni Ruel. Nanulod sila sa kwarto ug nahisama na hinoon si Ruel og underdog ni Sandra.

“Ayaw kabalaka Ruel, dili na ko dalaga pa mao nga nakasabot kaayo ko kun unsay mahitabo sa pag-uban nako kanimo dinhing dapita,” matud ni Sandra. Gipasabot ni Sandra si Ruel nga napukaw ang nahikatulog na unta niya nga pagbati atul sa ilang pagparayganay ganina.

Si Sandra na mismo ang miparayeg ni Ruel. Tuod, takulahaw lang usab nga nanginit si Ruel ug mikalit pag-abtik ug mipabatyag og talagsaong kahinam ni Sandra. Gihimo ni Ruel ang sagad buhaton sa usa ka lalaki aron mapukaw ang lawasnong kahinam sa babaye.

“Sandra, wala g’yud ko magdahum nga mahitabo kini karon kanato,” ni Ruel pa samtang padayong miparayeg ni Sandra. “Ingon man usab ako Ruel,” mubo nga tubag ni Sandra kay nagpungasi na ang mga parayeg ni Ruel kaniya.

Nahilom silang duha ug matag usa kanila nakabantay nga nag-anam pagpaspas ang pagpitik sa ilang kasing-kasing.

Paglabay sa tunga sa oras. “Gusto unta ko nga ikaw na ang ihulip nako sa akong kanhi bana Ruel, apan nasiguro ko nga duna ka na sa’y babaye nga gipasaligan nga maoy imong pakaslan,” matud ni Sandra.

Wala makatingog si Ruel. Ang tinuod, alang ni Ruel, bisan og bag-o pa sila nga nagkaila ug si Sandra apan nasabot niya nga bug-at kini sa iyang kasing-kasing. Apan mag-unsa man unya ang girlfriend niya nga si Kristine nga mipauli lang sa ilang dapit sa Mindanao?

Naglibog si Ruel. Giangkon ni Ruel si Sandra makatulo ka higayon atul sa ilang panag-uban. Gihatagan ni Sandra og contact numbers is Ruel sa dayon nilang panagbuwag didto sa Lahug rotunda.

“Gusto ko nga kun motawag ka kanako, kanang wala ka na’y kabilinggan sa laing babaye aron kita na ang mag-uban Ruel,” giingnan ni Sandra si Ruel sa dayon niining padagan sa iyang awto.

Gilantaw ni Ruel ang nagkalayo nga kotse ni Sandra. Milabay ang mga adlaw nga wala gayo’y contact sila si Ruel ug Kristine. Dili makontak ni Ruel ang iyang numero. Usa ka adlaw, may nag-text kang Ruel- si Kristine.

“Sori Ruel, may nahitabo nako diri sa Davao, dili na ko angay kanimo. Magbuwag na lang ta,” nasayran ni Ruel nga gikan ni Kristine ang text. Nakahilak siya. Gilugos si Kristine ug napugos pagpakasal sa naglugos kaniya. Pipila ka adlaw ang milabay, gikontak ni Ruel si Sandra. (Kataposan)