Nganong daghan ang natigulang dalaga

Makalibog, ang mga bati’g nawong naminyo’g sayo. Pero ang mga guwapa, dugay! Aduna pay natigulang na lang, nagpabilin gihapong dalaga. Kahadlok ba ang hinungdan, o ang subra ka himilian?

Normal lang sa babaye kun kinsay iyang gidamgo nga mahimo niyang life time partner. Iyang katungod ang pagpili sa tukmang lalaki nga alang kaniya. Natural, naa gyud siya’y giaray nga kritirya. Kinahanglan guwapo o presentable, may kasaligang trabaho nga makabuhi’g pamilya, buotan, kugihan, maunongon, mahigugmaon, one man-woman type, responsable ug daghan pang assets nga anaa sa usa ka lalaki ang gipangandoy nga iyang maangkon. Kun ang mangulitawo niya wala niining tanan, aw...di gyud niya sugton! Bisa’g usa lang ang wa, di gyud siya. Never! In short, this girl is perfectionist.

Nalimot siya nga ning kalibotan, no one is perfect. No man is an island. We, all are imperfect human beings. Busa, dili gyud makab-ot ang maong pangandoy. Lisod!

Wise ang Ginoo. Gituyo Niya pagbuhat ang tawo nga dili perpekto. Gusto Siya nga molihok ta ug mangita’g maayong paagi nga makorehian ang atong pagka-imperpekto. Mao ni ang Iyang ihatag nga asayinment inig kaminyo nato. Dili gyud ta tagaan Niya’g bana nga perpekto. May kulang gyud! Ug kita na mga asawa ang maningkamot unsaon nato pagpanday og mga butang nga ihulip, itapak o ipuno sa maong kulang aron kini mahimo nang perfect nga motukma sa ginadamgo tang kahingpitan. Pero timan-i, kun mulampos man gani ta, di gyud nato maangkon ang 100%.  Tingali, 95% lang. Ngano? Tungod kay ‘No Man is Perfect.’ Gikan baya ta sa unang mga ginikanan nga makasasala, nilang Eba ug Adan. Busa, we are born to be sinful. Bisa’g unsaon nato’g amping nga di na makasala, madakin-as gyud ta sa kalibutanong tentasiyon. Sin can never be eliminated, but it can be minimized. Mao nga 95% ra gyud ta kutob. At least, near to perfection. Payits na!

Kay kun dili ka payits ining 95%, Day, gusto gyud ka 100%, aw...di gyud ka maminyo. Kay wala gyu’y tawo nga perfect -- ang Ginoo ra! Ang kaminyoon usa ka dakong hagit pagsukod unsa kalig-on ang duruha ka kasingkasing nga gihiusa sa pagpakigbugno sa mga gumonhap sa kinabuhi.

Kun talawan ka modawat niining tahas nga gihatag sa Kahitas-an, magpabilin kang old maid hangtod sa kahangtoran.

Mao kini ang sagad hinungdan nganong daghan ang natigulang dalaga sa atong nasud. Kini tungod sa ilang pagka-perfectionist. Hadlok sila modawat og risgo. Gusto nila limpiyo daan. Unya, kay wala may tawong perfect? Lisora, sa?