Pabor ang adunay ngalan sa politika

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Dili malalis nga ang pamilya nga aduna nay ngalan ug nailhan na sa natad sa politika, makapabor gayod kun mosalmot sa bugnong lugaynon. Lisod pildehon kay gawas nga adunay kuwarta nga magamit,ilado na sila sa mga tawo. Dali rang mahinumdoman sa mga botante panahon sa eleksiyon ang ilang ngalan ilabi na gayod ang ilang apelyido.

Gani, adunay mga pamilya nga hangtod karon anaa gihapon sa puwesto, aktibo pa gihapon sa politika. Gikan sa mga ginikanan, hangtod na sa mga apo.

Ato kining nasuta dili lamang kaniadto kun dili sa umaabot usab nga eleksiyon sa sunod tuig. Sa senado gani, bisag senador pa karon ang igsuon apan milansar ang igsuon sa pagka-senador, bisa’g anaa pa sa katungdanan sa senado apan ang anak milansar sa pagka-senador. Bisa’g naglingkod pa sa senado apan ang asawa magpapili gihapon sa pagka-senador.

Mao usab kini ang nahitabo sa pagka-congressman, sa pagka-mayor ug uban pang puwesto sa gobiyerno sa lainlaing dapit sa atong nasod. Dili gusto nga adunay laing pamilya nga makapuli kanila. Buot nila nga sa tanang panahon sila ang maghari sa ilang dapit sa natad sa politika.

Ug ang nahitabo, walay tin-aw nga kausaban ug kauswagan ang dapit nga gialagaran. Kinsay mosukmat kanila? Wala kay ang kasagaran sa mga botante gibayran. O kaha, nakadaog sila pinaagi sa tikas. Ang mga politiko nga gustong magpabilin sa puwesto nga nahimutangan, kuwarta ug tikas ang gamiton aron lang gayod makadaog sa eleksiyon.

Lagmit mao usab kini ang mahitabo sa eleksiyon sa tuig 2013. Ang anaa sa puwesto nga adunay mga anomaliya nga gihimo sa pangatungdanan buhaton ang tanan aron dili mapilde tungod sa kahadlok nga kun lain ang makalingkod sa puwesto nga iyang nahimutangan mautingkay ang mga anomaliya nga gibuhat.

Apan ang mga botante karon lagmit nahigmata na. Nasayod na kun kinsa ang angay nilang botaran sa eleksiyon ug hatagan sa ilang pagsalig alang sa limpiyo ug tarong nga panggobiyerno.

Gikinahanglan kaayo ang check and balance sa matinud-anon nga pangatungdanan. Kitang mga botante angay nga ma-edukar niini.