Goodbye is not Forever - Gula 56

“Kun mahitabo man ugaling ang gihunahuna mo, Ma,” nagkanayon si Albert, dili ako ang nag-una. Sala sa babaye ang tanan.”

“Albert?” ang nasulti ni Nang Gloria nga wala magdahom nga mao kadto’y ikasulti sa iyang anak.

“Puyde ba, Ma?” ni Albert pa. “Magsulti lang unya ta pag-usab niini kun mahitabo na?”

Ug mibiya si Albert sa atubangan sa iyang inahan. Migawas siya ug midali sa paglakaw. Wala na niya paminawa ang pagtawag kaniya ni Nang Gloria. Si Vanessa nagpaabot kaniya sa pinuy-anan niini. Nagsabot sila nga hapiton niya kini. Sama sa naandan, manuroy na usab sila samtang wala pay trabaho. Taga Mambaling si Vanessa.

Nakalitan si Nang Gloria sa gibuhat ni Albert. Wala dayon siya makalihok sa iyang nahimutangan. Igo lang siya misunod pagtan-aw kang Albert nga migawas sa balay. Sukad masukad karon lang nahitabo nga gitalikdan siya ni Albert samtang nagsultihanay sila. Nabag-ohan si Nang Gloria sa mga gipakitang lihok sa iyang anak.

Nakapanghupaw si Nang Gloria. Nakamatikod siya nga dako na ang nahimong kausaban sa attitude ni Albert. Mihuot ang iyang dughan nga naghunahuna niini. Wala siya magdahom bisan gamay sa hinanaling kausaban sa taras sa iyang anak. -- Sumpayan pa