Batang Yagit

Gula 6

Nakabantay si Ramon nga dili bakakon si Nelsa kay mitug-an gayud kini sa iyang kinabuhi. Bisan og wala pangutan-a apan mitug-an kini kang Ramon nga duna na siya’y anak.

Wala na makurat niini si Ramon kay nasayud na man siya’ng daan nga may anak si Nelsa nga diriyot gani niya nadam-agan samtang nanaygon sa karsada.

Samtang nagpadayon sila pagsultihanay, nakabantay si Ramon nga gipaningot si Nelsa tungod tingali sa iyang pagsayaw kaganina. “Trapohan nako ang imong singot,” matud ni Ramon dungan sa pagkuot niya sa iyang panyo.

Sa hilom nahimuot si Nelsa sa gihimo ni Ramon kinsa wala niya maalinggati nga mao kini ang miadto sa iyang gipuy-an kaganinang buntag. “Swerte kaayo ka Apple kay mora’g pinangga ka ni sir,” matud sa tsismosa nga floor manager.

Igo lang mipahiyom si Nelsa ug dayon mitungab sa iyang ladies drink. Human nga natrapohan ni Ramon ang singot ni Nelsa, nabantayan ni Ramon nga misugod na sa pagbai-id kaniya si Nelsa.

Misandig si Nelsa kang Ramon. Gipahimuslan ni Ramon ang higayon, iyang gibalikisan sa bukton ang hawak ni Nelsa. Pagkalalim sa gibati ni Ramon nga nagakus niya si Nelsa.

“Ayaw ko’g gaksa dinhi kay mauwaw ko, dili ra ba g’yud ko magpagakus-gakus og mga customer, respitar ra ba g’yud na sila nako,” giingnan ni Nelsa si Ramon.

Milunga si Ramon sa iyang pagakus-gakus kang Nelsa apan wala gihapon niya kuhaa ang iyang tuo nga bukton nga mibalikis sa hawak sa dancer.

“Nganong imo man nga gitrapohan ang akong singot?” nagngisi si Nelsa nga milingi ni Ramon. “Ana g’yud na basta pinangga,” abtik kaayo nga nakatubag si Ramon.

Naigking si Ramon kay gikusnit paghinay ni Nelsa ang iyang kilid. Mora’g giganahan si Nelsa nga nakadungog sa iyang gisulti.

“Pwede ba nga dili ka na lang motiwas sa pagsayaw?” giingnan ni Ramon si Nelsa. Mitutok kang Ramon si Nelsa, unya mipahiyom. Giusban niini sa pagkusnit ang iyang kilid. Nakasabot si Nelsa sa iyang tumong.

“Kinahanglan ka pa nga mobayad og bar fine kun igawas ko nimo,” matud ni Nelsa. “Walay problema, akong bayran,” dali nga tubag ni Ramon.

Gisinyasan ni Ramon ang floor manager. Miduol dayon ang mahuyang. “Kwentaha pila ang akong bayranan, apil ang bar fine nako ni Nelsa,” matud ni Ramon.

Gituyo ni Ramon nga ibuyang-yang ang iyang pitaka aron makita ni Nelsa nga daghan kini’g sulod dihang mibayad siya sa iyang obligasyon.

Nanggawas dayon sila sa Wildflower bar. “May kotse ka diay?” matud ni Nelsa sa dihang miduol na sila sa nagparada nga awto. Mipasirit dayon si Ramon paingon sa kinaham niya nga lugar. (Sumpayan)