Goodbye is not Forever

Gula 52

“Maayo tingali nga manglingkod kita,” misugyot si Vanessa kang Albert sa kadugayan,” aron mas nindot ang atong panag-estorya. Didto tang dapita, o.” Ug migunit ang dalaga sa bukton sa ulitawo. gibitad ni Vanessa si Albert paingon sa usa ka lapad nga bato nga nalayo sa daghang tawo nga nangaligo. Minunot si Albert kang Vanessa.

Gisud-ong ni Albert ang panagway ni Vanessa samtang hinay sila nga nanglakaw subay sa pinong balas nga gitumban sa hubo nilang mga tiil. Nabatyagan sa ulitawo ang pagkapaod sa tigson nga dughan sa dalaga piit kaayo sa iyang bukton. Daw  nanuslok kaniya ang tumoy sa bus-ok kaayo nga suso niini. Dihay laing pagbati nga kalit mihakop sa iyang kaugalingon. Apan ingon sa gibalewala lang kini sa dalaga.

Nanghunong sila sa paghitungod nila sa nahimutangan sa lapad nga bato nga may gidak-on nga igong kalingkoran og duha ka tawo. Hapit sila magkadungan paglingkod. Nagtupad sila nga gidip-ig ang lawas sa usa’g-usa. Gitutokan pag-ayo ni Albert ang nawong ni Vanessa. Mora’g dihay buot niyang basahon sa panagway sa dalaga.

Misandig si Vanessa sa dughan ni Albert. Naigking si Albert nga nakalitan. Wala siya magdahom nga mao kadtoy buhaton sa dalaga. -- Sumpayan pa