Batang Yagit

Gula 5

Daw natulala si Ramon nga nagsigi’g tutok ni Nelsa nga nagsayaw didto sa stage. “Mora’g admirer ka ni Apple sir no?” nakurat si Ramon nga mikalit paghunghong kaniya ang mahuyang nga floor manager.

Takulahaw lang nga miiknat ang iyang kilay kay Apple ang giingon sa maong mahuyang nga ngalan ni Nelsa. “Unsay ngalan nianang dancer?” gipangutana ni Ramon ang mahuyang. Lahi sa ubang dancer, special kaayo ang costumes ni Nelsa.

Wala magsul-ob si Nelsa og yano lang nga “two piece” kay ang iyang gisul-ob gihimo sa panapton nga magsinaw-sinaw nga makapasamot sa iyang kaanyag. Giingnan ni Ramon ang mahuyang nga floor manager nga gusto niya nga ikatibol si Nelsa nga naggamit sa angga nga Apple.

Gipakuhaan daan niya og usa ka botelya nga ladies drink. Special g’yud nga ladies drink ang iyang gipaandam, dili sama sa uban nga isulod lang sa baso. Sa matag botelya nga ladies drink makabahin ang dancer og P300 nga komisyon.

Gipayungyong og gamay ni Ramon ang iyang kawo aron dili kaayo mabantang ni Nelsa ang iyang panagway. Gusto niya nga masurpresa si Nelsa sa iyang pagbisita. Tuod, nalantawan niya nga nagpaingon na si Nelsa sa iyang nahimutangan, lahi na ang gisul-ob.

“Dali day, lingkud,” gipalingkud sa floor manager si Nelsa tupad g’yud ni Ramon. “Nakadayeg kaayo si sir sa imong pag-arte sa stage Apple. Sigi, abi-abiha si sir day,” giingnan si Nelsa sa floor manager.

Gitutokan ni Ramon ang panagway ni Nelsa. “Gwapaha g’yud diay nimo uy,” giingnan ni Ramon si Nelsa dungan sa paghikap sa iyang suwang. Miipis si Nelsa og ladies drink ngadto sa baso og miinom.

“Ako na ang bahala sa imong income karong gabhiona Apple,” giingnan ni Ramon si Nelsa. Dili niya gusto nga makahinumdom dayon kaniya si Nelsa kay nahadlok siya nga mauwaw kini og moislag unya.

Taud-taud, wala tuyoa ni Ramon nga gipatong ni Nelsa ang wala niya nga kamot ngadto sa iyang paa samtang gihinay-hinay kini sa paghapuhap. Anam-anam kini nga nakasugnib og talagsaong kainit kang Ramon.

Human og tungab ni Ramon sa botelya sa beer, ang tuo niya nga bukton didto usab mitugpa sa hawak ni Nelsa. Hinay nga gipislit-pislit ni Ramon ang tiyan ni Nelsa, dayon iyang gihapuhap.

Gikan sa tiyan, anam-anam nga misaka ang mga kamot ni Ramon nga naghapuhap paingon sa ibabaw nga bahin. Giagbayan ni Ramon si Nelsa ug wala mopalag niini ang babaye. (Sumpayan)