Gihidlaw na sa asawa ning paskoha

Atol gyod adlaw sa pasko, naghanduraw ug nanampiling si Max sa ilang bintana nga nag-umbaw sa gamay niyang uma nga gitikad matag karon ug unya.

“Biyaan tika Maximo gumikan kay nag-ugtas nako sa pagpunay mog barkada, inom ug sugal! Dad-on ko ang bugtong natong anak nga si Bolantoy sa paglayas ko niining payag nimo nga gabahirig nga usa lang ka tayhop sa hangin, malupad gyud ni!!!,” pulong sa iyang asawa nga si Kurdapya nga nanghipos na sa iyang pipila ka mga bisti nga dad-onon usa ka sayong kabuntagon nga duhaon na ka tuig ang milabay. Mao kining mga pulonga ang miukiot sa panumdoman ni Max karong panahona.

“Gimingaw ug gihidlaw na man ko ni Kurdapya..., ngano kaha ni no?” Nakapangutana sa hilom si Max sa iyang kaugalingon samtang nagsud-ong sa mga kabataan nga nanaygon sa ilang silingan.

“Mga duha na ka tuig ang nakalabay da ... bisan baya og dili kaayo to  hitsuraan si Kurdapya apan hamis kaayo to og mga paa ug dagko pa gyud nuntan pa sa iyang sampot nga porma kaayo og pan ‘elorde’ nga mora’g gadala og ‘come here’ sa mga cats”, padayon pa ni Max sa iyang hunahuna.

“Maypag apason kaha to siya nako sa balay sa iyang mga ginikanan didto sa Masbate,” mibathay sa iyang panagway ang usa ka pahiyom ug mipadayon siya.

“Saaran nako si Kurdaps lakip na iyang mga ginikanan nga magbag-o na ko sa akong kinabuhi,” matud pa ni Max. Ug may mikalit la’g punuktok sa pultahan.

“Tok, tok, tok!’, nabati ni Max ang kasikas sa ilang pultahan. Ug sa pag-abli niya, maoy mitangka sa iyang panan-aw ang panagway nga dugay na niyang gihandom nga mao ang asawa niyang si Kurdapya nga nagpahiyom uban sa ilang anak nga mao pay pagkat-on sa paglakaw.” Max bag-ohon nato ang atong kinabuhi ug gipasaylo ko na ikaw karong paskoha!. Dili man diay lalim nga mabulag ka sa tawong imong gimahal sa dugay’ng panahon ug sakto na ang duha ka tuig aron ikaw ako nang pasayloon,” namulong si Kurdapya ug dayon gakos kang Maximo og hugot kaayo ug mipadayon siya.

“Gimingaw ug gihidlaw na sab ko kanimo Maximo.”

“Tinuod ka Day Kurdaps?! Daw sa dili ko makatoo niining tanan ... mibalik ikaw uban sa pinalangga tang anak nga si Bolantoy,” pulong sa tumang kalipay ni Max.

“Maglipay tag maayo sa hilabihan karong paskoha Max,” agni ni Kurdaps sa iyang bana ug nanulod dayon sila sa kwarto samtang ang  bugtong nilang anak nagkalingaw og duwa sa mga dulaan nga ilang dala. Samtang sa lawak nilang Maximo ug Kurdapya, bugtong inagulo ug inagik-ik lang nilang duha ang mabati ning paskoha! (Katapusan)