Batang Yagit

Gula 3

Gibuksan sa bata ang pultahan nga gihimo ra sa lipak sa kawayan. "Ma, ma naa baya'y nangita nimo sa gawas," matud sa bata nga didto sa sulod. "Kinsa man?" bawos-pangutana sa inahan sa bata.

Taud-taud, may midung-aw sa bentana sa gamay'ng balay. Kalkag ang buhok sa maong babaye apan bisan pa niini mibathay gihapon ang iyang kaanyag. "Akong gihatud ang imong anak ma'am kay diriyot na nako madam-agi. Pwede mosaka?" ni Ramon pa.

Wala dayon motubag ang inahan ni Alex, wala gani kini mopahiyom. Pabiling nagbarug si Ramon atubangan sa balay. "Dali sulod lang," matud sa inahan ni Alex nga mibukas sa pultahan. "Paghinay lang kay gabok na tawon ning among balay."

Nag-short pants ra ang inahan ni Alex ug nabantang kaayo sa mga mata ni Ramon ang puti niini nga mga paa nga mora'g manghod ra's balanghoy ang kaputi. Gipalingkud sa inahan ni Alex si Ramon niadtong plastic nga lingkoranan.

Nagpaila si Ramon sa inahan sa bata. "Nelsa ang akong ngalan sir," paila sa mama ni Alex. Gipasabot ni Alex nga peligroso kaayo ang gihimo sa mga bata nga mosugat unya mosaka sa mga PUJ, dungan sa pagtabok-tabok sa karsada, aron lang mangayo'g pinaskohan.

"Ako na baya na siya nga gipasidan-an nga dili mouban anang ubang bata nga manaygonay apan molakaw man g'yud kay matulog pa man gud ko," pasabot ni Nelsa.

Nauwaw unta si Nelsa nga motug-an sa iyang trabaho apan wala siya makalimod kay giunhan siya ni Ramon nga gitug-anan na siya sa ubang bata nga dancer ang iyang trabaho mao nga kaadlawon na kini nga mahiuli.

"Naa ko nag-dancer sa usa sa mga imnanan sa Sanciangko," matud ni Nelsa. Naikag si Ramon kay kaniadto kanunay siya nga mag-anhaan sa sikat kaayo nga Wildflower bar.  Iya kining gitug-an ni Nelsa.

"Hala, naa ko diha magtrabaho sir, abli na man og balik apan lain na ang manager kay nadakpan man kay nagpasayaw og mga babaye nga walay sinena," matud ni Nelsa.

Daw dali ra nga nagkasuod sila si Ramon ug Nelsa. "Kun mao, kaila ka diay ni Wendel? Kumpare nako na ang tag-iya sa bar," matud ni Ramon. "Aw kaila ka diay ni sir Wendel?" ni Nelsa pa nga nagsugod na og pahiyom kang Ramon.

"Mosugot ka ba kun suroyon tika didto sa imong gitrabahoan Nelsa?" giingnan ni Ramon ang batan-ong inahan ni Alex. "Sure, nganong dili," ni Nelsa pa.

Gikuhaan ni Ramon og contact numbers si Nelsa ug gihatagan og tibuok usa ka libo ka pesos. "Paliti og bag-ong sinena si Alex ug ayaw na pabalika sa pagpanaygon." (Sumpayan)