Batang Yagit

Gula 2

Nabalaka si Ramon kay gamay pa kaayo ang maong bata nga moapil na sa pagpanaygon ug pagpangayo’g kwarta sa mga pasahero sa PUJ. Nalantawan niya nga moabut ang higayon nga maaksidente g’yud ang maong bata.

“Asa dapit ang inyong balay dong?” gipangutana ni Ramon ang bata. Walay hunong ang pagngisi-ngisi ni Ramon aron dili mataha kaniya ang bata. Igo lang mitudlo ang bata paingon sa taytayan sa Camputhaw dihang gipangutana niya og hain ang ilang balay. Dunay nagsingabot nga nagbaligya og ice cream. Nakahuna-huna si Ramon nga hayloon niya ang bata sa ice cream aron nga makig-estorya na kini kaniya. “Kaon ka’g ice cream?” gisukna niya ang bata. Dali kaayo kini nga miyango.

Gitagsaan ni Ramon og ice cream ang tanang bata nga manaygon sa mga sakyanan. “Unsay ngalan aning bataa dong,” gipangutana ni Ramon kadtong daku-daku niini nga kauban. “Alex na siya sir, gwapa ra ba na’g mama,” matud sa laing bata.

“Mao ba? Unya nganong gipasagdan ra man lagi ni siya sa iyang mama?” nakapangutana si Ramon. “Dancer man gud ang iyang mama sir, usahay mabuntagan pagpauli mao nga wala may kauban sa balay nila, mokuyog ra siya namo’g panaygon,” pasabot sa laing bata.

Ang pulong dancer ug gwapa nga maoy paghulagway sa laing bata ngadto sa inahan ni Alex maoy nakapaikag pa gayud ni Ramon nga moadto sa balay sa bata. Karon nasayud na siya kun ngano nga anaa sa karsada kining bata nga diriyot niya madam-agi.

“Asa dapit ang ilang balay dong?” gipangutana ni Ramon ang bata nga maoy labing estoryador sa tanan. Sama ni Alex, ang bata mitudlo ‘sab tumong ngadto sa taytayan sa Camputhaw. Human nila’g kaon sa ice cream, giagni ni Ramon si Alex nga mopauli na ug mokuyog siya.

Gihatagan niya’g dugang mga sensiyo ang bata. Tuod, wala siya mosipyat kay naamigo na ni Ramon si Alex. “Naa ba’s mama nimo sa balay karon Alex?” matud ni Ramon nga migunit sa bata sa iyang kamot.

Samtang nagsingabot sila sa kabalayan duol sa tulay, gitan-aw sila sa mga tawo nga nagtoo nga gidakup ang bata nga si Alex, kinsa bulingit kaayo’g panagway.

“Da, nadakpan ka na Lex, sige man gud mo’g panaygon,” matud sa usa ka bata. “Wala ni siya dakpa uy, ako ni nga giubanan pauli. Asa ang ilang balay dong,” gipangutana ni Ramon ang bata. Gitudlo niini ang usa ka gamay’ng balay daplin sa sapa.

“Aw mao kini ang inyong balay Lex?” matud ni Ramon nga miliraw ang mga mata sa palibot. (Sumpayan)