Ang masyador

Kilas nga miliraw ang mga mata ni Dodo sulod sa usa ka bag-ong bulangan dinhi sa siyudad. Ning Domingoha, bisan wala siya’y agalon nga gimasyadahan, apan namasin sa pagpamulang si Dodo sa kinaugalingon aron makadaog. Ang usa ka libo ka pesos niyang puhonan miabot nag tres mil pesos. Nakasakay siya sa duha ka sultadang samaluna – ang inilog ug biya nagpulipuli og daog. Ning Domingoha siya ang masyador sa kaugalingon niyang pagpamulang.

Inilang masyador si Dodo sa bisan asang bulangan sa siyudad ug sa bisan asang tigbakayan sa mga barangay. Ang pagka-masyador maoy nahimo niyang panginabuhian. Lainlain lang ang mga suking puntos nga negosyante ug adunahang sugarol nga magpamasyada kaniya panahon sa bigtime derby sa mga igtataring manok.

Kadali da siyang makakuwarta, ilabina kun debuynason ang mga puntos nga sugarol nga nagpamasyada kaniya. Apan tungod sa bisyo ni Dodo nga nagumon sa ginadiling droga ilabi na sa paghithit og shabu ug sa pagkahimabaye (ulitawo siya sa edad nga 30 apan wa gyud magminyo), kanunay siyang maapiki sa pinansyal niyang pangihanglan.

“Klaroha, Do! Kapin na sa bayente mil pesos ang bayranan mo sa nagamit mong shabu...!” Kagahapon naningil niya ang suking drug pusher nga nahimo niyang suki sa gipuy-ang barangay.

“Kun gusto kang mo-out nako, Do, aw, sugot ko sa ten thousand pesos alang sa atong one night stand...!” miprangka kaniya si Brenda, ang guwapa ug mestisang GRO sa usa ka resto bar nga 18 anyos pa ang panuigon nga hagbay pang gipangindahay ni Dodo nga matilawan.

Mao kini ang hinungdan nga namasin siya sa pagpamulang ning Domingoha sa kinaugalingon nga paagi–isip masyador. Ug kinahanglan siyang makakuwarta ning higayona. Hilabihan kagahob ang masyada sa sulod sa bulangan.

“Diyes....! Diyes sa inilog...!”

“Tagup-at! Tagup-at...!”

“Tinunga....! Tinunga...!”

“Tres dos...! Tres dos....!”

Mimarkag bahala si Dodo. Sa biya siya. Gidawat niya ang tanang logro nga masyada. Mikabat sa usa ka gatos ka pesos ang tawag niyang pustada. Kun swertehon nga mudaog, libre nang makabayad sa utang niya sa shabu ug libre na niyang maromansa si Brenda.

Gibati’g kakulba si Dodo dihang nagsugod na ang sultada. Pipila ka gutlo, mipatigbabaw na usab ang suliyaw sa tanang sugarol sulod sa bulangan dihang natapos na ang sultada.

Gipaningot og ingon sa bugbog si Dodo ug mora’g naglutaw siya sa hangin nga abtik miuliot paglakaw sa daghang sugarol aron pagsibat. Napilde ang biya! Dako ang kantidad sa iyang napago! Dihang mogawas na unta si Dodo sa bulangan, lima ka lalake  nga nagsunod kaniya, ang kalit misignit kaniya.

“Namago kang masyadora ka...!”

“Buot pang mosibat...!”

“Angay kang bukbukon! Patyon...!” Ug mao na lamay nabatyagan ni Dodo nga gitabangan na siya’g kulata sa lima ka mga lalake, taman sa ginhawa. Hangtod, miawop iyang panan-aw. (Kataposan)