Bisyosong bana

Dear Tita Salie,

Maayong adlaw. Tawga lang ko sa pangalan nga Mylen, usa ka minyo ug duna nay mga anak.

Wala gyod ko magdahom nga ingon niini ang mamahimong dagan sa akong kaminyoon. Anaa sa akong hunahuna nga nindot ang akong kinabuhi tungod lagi kay mahal man ko kaayo sa akong nahimong bana.

Sa una moinom man gyod ni siyang daan, Tita Salie. Nasayod nako niini. Apan wala nako damha ug wala gyod ko magtuo nga iya pod diay nga sudlan ang laing bisyo. Bisyoso na gyod kaayo kining akong bana, Tita. Ug nagproblema ko pag-ayo tungod kay gamay pa ra ba ang among mga anak. Wala gyod siya magpakabana sa among pamilya ug sa kaugmaon sa among mga anak.

Sa akong tan-aw mora’g mahurot lang gyod ang iyang kwarta diha sa iyang bisyo. Ang akong pangutana, Tita, kun unsay akong buhaton niining bisyoso nakong bana. Ako ba kini siyang biyaan? Pero mangita man sad god ang mga bata kaniya. Unsa may akong buhaton? Palihog pasabta ko. Thank you and more power. God bless. -- Mylen

* * *

Maayong adlaw, Mylen. Sama sa akong gitambag sa ubang mga asawa, ug mao gihapon ang akong ipabuhat kanimo kay segun sa akong nasayran mao gyod kini ang labing epektibo nga solusyon sa mga bana nga badlungon.

Alang kanako ang mga bana nga sama sa imong bana, kulang lamang sa karenyo ug parayeg. Abi god nimo sa kinabuhi sa kaminyoon natural lang gyod nga mag-away ang magtiayon. Duna gyo’y higayon nga sila dili magkauyon. Kun muabot na gani kining higayona unya ang magtiayon tag-as kaayo og garbo ug pulos walay pasensya, ang gamay’ng problema dali  kaayong mudako, ug usahay mao pay hinungdan nga mabungkag ang ilang pagpuyo tungod kay wala nay pagsinabtanay.

Busa mas maayo gyod kun ikaw suheto sa imong bana ug nasayod ka kun unsaon nimo siya pagkarenyo. Kun ang imong bana bisyoso ayaw siya awaya o kasab-i kay segurado ko musamot siya nga dili na mouli ug magsige na lang hinuon og inom.

Ipakita nga wala ka maapektuhi sa iyang binuhatan, pagpabilin nga composed lang gihapon. Ug imo siyang paraygan permi ug karenyohan. Kay matud pa sa usa ka psychologist mao kini ang common weakness sa mga lalaki. Kun makig-estorya ka sa imong bana, iatol nga linaw ug bugnaw ang iyang panghunahuna kun duna kay ihangyo kaniya, nga mag-usab na siya, mas nindot kining buhaton human gyod sa inyong love making. Kay maglisod gyod og balibad kanimo ang imong bana. -- Tita Salie