Ang kalanog sa tiyabaw ni Alberta wakwak

MOTUO KA’G DILI

Panadtaran, San Fernando, Cebu

Matag hugpa gyud sa kilomkilom matugaw dayon ang duol nga silingan sa tingog sa usa ka babaye nga nagminatay og hilak. Usa ka matang sa tiyabaw nga naghambin og kasub-anan. Matag ingon gayod niaron nga motikyop nang kilomkilom  ang tiyabaw ni Alberta maoy madungog sa ubos ug mohunong lang kini inig-abot sa alas dose sa gabii.

Nganong ingon man niini si Alberta nga motiyabaw siya nga ingon sa dunay gimahayan sa kalibotan. Matud pang Zosimo, anak ni Baldo nga tigsakag lubi dinhi sa ilang baryo, ang pagsige’g minatay ni Alberta tungod sa pagkamatay sa ilang iro nga si Daryok.

Pero, matud pa sa mga silingan ang namatay nga iro mao ang iyang bana nga taga isla. Way nakaila sa iyang bana apan may nakakita nga motumaw lang kini matag Biyernes sa gabii ug unya mahimo kining usa ka iro. Motawag dayon si Alberta kang Daryok nga iyang iro, pero, kadto diay’ng   iroa iyang bana.

“Kinsa man diay ang nakapatay sa iyang iro, Bruno?” nangutana ang iyang asawa.

“Ang nakapatay sa iyang bana? Sa iyang bana nga iro?” dihay pintok nga tubag-sumbalik si Bruno sa asawa. “Aw, ang makamao sa pangontra sa ungo, Gualda. Aw, dinhi sa ato, si Zosimo ra may suheto anang panguntra sa ungo...aw, lagmit siya’y nagpatay sa bana ni Alberta...”

Batan-on pa si Alberta nga nabiyuda ug sa iyang kabatan-on daghan ang naibog kaniya kay gawas nga nindot siya’g lawas, puti ang iyang pamanit ug bugdol ang iyang sampot. Nindot usab siya’g mga batiis nga ang usa ka lalaki maoy makakita magtilagak gyud ang laway.

Unya usa ka gabii, wala na mominatay og hilak si Alberta. Ug ning gabhiona, mihinok si Bruno pag-adto sa bungtod diin tua mahimutang ang balay ni Alberta. Tuod, maoy nakita ni Bruno si  Alberta nga naligo sa tubig nga diha sa dakong tadyaw sa likod sa kusina. Wala’y sapot si Alberta ug nagpanilap si Bruno nga ingon sa kadasmagon na kang Alberta. Tuod, wala gyud kaagwanta si Bruno sa iyang nakita kay mikatol man lang iyang mga tiil nga midagan paingon sa nahimutangan  ni Alberta apan kalit kining mibarog.

“Sayod kong moanhi ka gyud dinhi kanako, Bruno. Dugay ko na ikaw’ng gipaabot,” ni Alberta pa kinsa hubo ang lawas nga miatubang kang Bruno. “Ug sayod sad kong ikaw ang mipatay sa akong bana, nga si Daryok, kay may gusto ka nako, di ba?”

Mipahiyom si Bruno. “Karong gabhiona, angkonon ko ikaw, Alberta, he, he, he, he, he lami kaayo ka’g lawas...”

Mibahakhak og katawa si Alberta. Dinhi milihok dayon si Bruno apan bisa’g unsaon niya dili gyud siya makalihok, dili niya malihok ang iyang mga tiil ug kamot nga mora’g gilansang. Dinhi, giduol siya ni Alberta ug gipaak ang liog, “Ngrrrrrrkkk...hmmm.... giuhaw ako sa imong dugo, Brunoooo...”

Taudtaod mitumaw si Zosimo nga sama diay kang Alberta usa na ka mangtas nga ungo. Human ni Alberta, si Zosimo na pud ang misuyop sa dugo ni Bruno.

“Nakabawos ka na gyud sa gibuhat ni Bruno kang Daryok, Alberta, wakwak, wakkkk, wakkkk, wakkkk” ug wala na mabati sa mga silingan ang minatay ni Alberta sukad mamatay si Bruno. Ug ang ilang mabati mao na usab ang awit ni Zosimo. (Kataposan)