Karsada sa V. Rama guba na

Kun dunay kinanindotang dalan nga agian ning siyudad, wala nay makalupig sa V. Rama. Hamis ug flat, wala gyu’y libaong o naugdong bahin nga ang nawong niini nga maligsan sa ligid. Haskang tulina sa dagan sa sakyanan. Wa gyu’y untol. Wa gyu’y kagulkol!

Apan pagpangligid sa mga katuigan, human yatakyataki sa daghang ulan nga nangagi, hinayhinay’ng nangapaslot ang dalan, nawala na ang kahamis ug maoy mipuli ang mga lungag. Sa sinugdan, gamay pa. Nagkadugay, nagkadaghan. Hangtod nga nahimo na gyung dagkong mga libaong. Mountol-kuto intawon ang ligid nga mabuwasot. Samtang ang ulo sa mga sakay mosangko sa atop. Ambot, kun wala ba kahay buntis nga nakuhaan?

Milihok baya dayon ang Department of Public Works and Highways (DPWH). Ilang gitapakan og bag-ong aspalto ang mga lungag. Ang nakaporke lang, kay dili level sa orihinal nga sukod ang pagkabulit niini. Subra ra kabugdo! Mora na hinuog nakaagi’g dumagsa nga balod ang mga sakyanan. Magkiyodkiyod. Magtuyatuya. Ug moagunto! Dili lang makaguba sa mga liyantas. Kun dili, sa dughan usab! Lalim bay, kun dunay mga piyesa nga maguba, problema na man pud sa bulsa?

Nganong ingon ini gyud kaha ang agi sa tinapakan sa DPWH? Nganong dili gyud sila makabuyon niini tupong sa nawong sa dalan? Imbes malipay ang mga motorista, maguol na hinuon. Kay pagkangan nga giayo ang dalan, giguba man nuon nila’g samot! Nawala tuod ang lungag. Pero, gipulihan man sab og butoy.

Dako na gyud kaayo ang pagka-usab sa hitsura sa dalan V. Rama. Kaniadto, guwapa kaayo kini. Apan karon, puwerte nang gubaa. Nasayod ba kaha si Mayor Mike bahin niini, no? Dalan baya ni nga nagngalan sa ilang kaliwat, kinsa girespeto sa katawhan sukad pa kaniadto hangtod karon. Busa, angay lang unta nga imintinar ang kanindot. Ikaduha, anhi agi ang magpanon nga sakyanan paingon sa Guadalupe Church niadtong Nobiyembre 27, diin gihimo ang unang misa sa pagka-Santos ni San Pedro Calungsod. Daghan baya kaayong mga bisita ang nanganhi niadtong adlawa. Ato ning ipaayo, Mayor Mike samtang may panahon pa. Kaya, ba!