Ang tawo nga mag-sunglass mosimba

Di gyud kapugngan ni Fr. Derpa nga masina kung makakita niining usa ka tawo nga mag-sunglass mosimba sa iyang misa tulo na ka Domingo ang milabay sukad siya nadestino ning maong parokya -- ang parokya nga daghang mga gwapa, seksi ug batan-ong babaye.

Maoy iyang pagtuo nga misimba lang ning lakiha aron mantsiks. Duna man guy magpakita diri sa ilang legs, mag-backless, magpakita sa ilang cleavage.

Mosurok iyang dugo ning tawhana kay di siya gustong kompetensyaan. Tan-aw niya di maglagyo ilang edad, 35.

Puparehas sila’g height, pamanit ug dukirok. Sa iyang pakisusi bag-o pud kuno ning tawhana nagpuyo diri sa samang adlaw sa iyang pag-abot. Ug sa dihang nagkatagbo ang ilang dan paghuman niya’g misa, wa niya palabya ang higayon nga ikahinabi ang maong tawo labi na dihang una kining miingon niya’g “Maayong buntag, Dre!”

“Maayong buntag sab! Aw, kadyot sa diay,” matud ni Fr. Derpa dihang milabay na ang maong tawo nga nag-sunglass.

“Unsay akong ikaalagad, Dre?” matud sa tawo nga milingi.

“Kinsa gani pangan nimo?” matud ni Fr. Derpa.

“Edloss, Dre. Ngano man diay?” ni Edloss.

“Mohangyo lang ta ko nimo, kung mosimba ka kuhaa nang sunglasses sa imong mga mata. Ayaw kanag isul-ob sud sa simbahan kay wa may silaw sa adlaw nga makapadaut sa imong panan-aw,” tinarong nga pagka-explain sa pari. Pero sa iyang deep inside gud gihambogeroan siya ning tawhana. Mora kuno’g kinsang gwapoha bisa’g mora’g Fredrick F. Gelbolingo rang hitsura.

“Okey, sa sunod Domingo kuhaon ko nang sunglass, Dre. Basta di na nimo pasudlon sa simbahan kanang mga seksi nga babaye nga magsul-ob og short ug backless nga magpaibog sa ilang legs ug cleavage nga mas silaw pa sa adlaw nga makapadaut sa akong kalimutaw,” tubag ni Edloss.

Daw nawagtanga’g alphabet letter si Fr. Derpa sa maong nadungog. Mora’g gisiperan iyang baba. Sayop diay iyang pagtuo sa maong tawo. Nagkanayon iyang hunahuna. Nadunggan na lang niya si Edloss nga nagkanayon! “See you next Sunday, Fr. Derpa. Hasta la Vista!” (Katapusan)