Tip sa Pasko Gula 2

Wala makapugong si Triz sa paghikap sa bukton ni Sammy tungod sa kalipay nga gihatagan siya’g P2,000 nga pinaskohan. Nagpahiyom kini nga nagbarug kilid sa kotse ni Sammy nga nagpaabot sa iyang sukli.

“Dakua sa imong gihatag nga pinaskohan nako uy… ang sa akong mga kauban tag P500 ra man lagi ang ila,” matud ni Triz. Mipahiyom si Sammy nga mitutok ni Triz. “May ihatag pa ko nimo para sa bag-ong tuig,” giingnan ni Sammy ang gwapa nga gasoline girl.

Misamot nga mipahiyom si Triz nga nakadungog nga hatagan pa diay siya ni Sammy ug para sa bag-ong tuig. Wala paabuta ni Sammy nga gikusi ni Triz ang iyang aping samtang diha siya atubangan sa manobela.

Gigunitan ni Sammy ang kamot ni Triz. Wala dayon niya kini buhii ug samtang iya kini nga gigunitan, gitutokan niya si Triz. “Pwede ko ba ikaw nga pik-apon unya inig off nimo sa trabaho Triz?” gipangutana ni Sammy ang dalaga.

“Nganong imo man ko nga pik-apon?” nakapangutana si Triz. “Gusto lang ko nga makig-uban nimo Triz. Mag-dinner ta ug ayaw kabalaka kay ihatud tika kun asa ka magpuyo,” matud ni Sammy.

Nagkauyon gayud sila si Triz ug Sammy nga magdeyt inig off niya alas siete sa gabii. Dihang nakabiya na si Sammy sa gasoline station, gipinsar niya pag-ayo kun asa sila manuroy si Triz unya sa gabii.

Pagka gabii, wala pa gani alas siete didto na si Sammy sa gasoline station nga gitrabahoan ni Triz. Giparada niya ang kotse kilid sa gasoline station. Giduol siya ni Triz nga nagpahiyom. “Kadiyot lang Sam ha?” matud ni Triz.

Taud-taud, migawas na si Triz nga wala na magsul-ob sa uniporme sa mga kawani. Nagsul-ob og karsones-maong ang dalaga nga giparesan niini og green nga T-shirt nga dunay kwelyo nga gi-insert ngadto sa karsones.

Karon nasuta na g’yud ni Sammy ang kanindot sa lawas ni Triz. “Ayo-ayo mo Triz ha?” matud sa mga kauban niya sa gasoline station samtang nagngisi. “Asa ang gusto nimo nga adto ta mag-dinner?” gisukna ni Sammy ang dalaga.

“Ikaw gud… bisan asa, dili man ko pilian og makaon,” dali nga tubag ni Triz. “Sigi, adto ta sa usa ka kan-anan sa North Reclamation Area sa Mandaue kay maayo didto kay anaa sa roofdeck ang kan-anan ug makita ang kinaubsan.

“Alegre na man diay dinhing lugara no? Nganong nakigsuod ka man nako Sam nga usa ra man ko ka gasoline girl?” matud ni Triz. Mipahiyom si Sammy. “I admire your beauty Triz mao nga nakigdeyt ko nimo,” walay lipud-lipod si Sammy nga mitug-an. (Sumpayan)