Goodbye is not Forever Gula 43
Milabay ang daghang mga adlaw. Si Eking wala na mahibalik sa balay nila ni Albert sukad niadtong nag-inom sila og hilabihang huboga ni Albert.
Gilaayan si Albert sa ilang balay. Wala siya’y laing ika-estorya-estorya gawas sa iyang inahan nga si Nang Gloria. Maayo na lang kun ting trabaho kay aduna man siya’y mga kauban sa call center nga iyang gialagaran. Kun dili siya makatulog mosuroy siya sa Ayala, motan-aw og sine, usahay sa SM. Ug usahay usab adto lang siya sa duol sa ilang gipuy-an sa Talisay makigdula og basketball kay mahiligon man siya niining dulaa.
Apan inigpauli niya sa balay, mosaog na usab sa iyang kaugalingon ang kalaay. Ilogon ang iyang kahimungawong sa paghunahuna nga atua ni Josheba sa Canada. Ug bation gilayon niya ang labihang kamingaw sa iyang hinigugma.
Dunay mga higayon nga si Albert wala mo-report sa call center nga iyang gitrabahoan sulod sa tulo ka adlaw. Nag-sick leave siya bisan wala siya’y sakit. Wala lang gyud siya ganahing mo-report sa trabaho. Diha ra siya sa balay nag-standby, naglublob sa iyang kuwarto. Wala sa maayong condition ang iyang lawas. Kapoy ang iyang pamati.
Si Nang Gloria nga nakamatikod sa iyang kahimtang nakigsulti kaniya.
“Naunsa man ka, Albert, may problema ba?” ni Nang Gloria pa.
“Okey man ko, ma” tubag ni Albert “Wala kay angay kabalaka-an bahin kanako.” -- Sumpayan pa
- Latest
