Nangandam na unta

Dear Tita Salie,

Maayong adlaw. Just call me James T., ulitawo ug dunay trabaho. Nagpadala gyod ko niining akong suliran, Tita, kay aron makuhaan ang kasakit nga gibati sa akong dughan.

Duna ko’y hinigugma ug 9 na kabulan ang among relasyon. Sa akong tan-aw mora og seryoso na ming duha ug nagplano na mi nga magminyo na lang. Busa medyo naningkamot na ko pag-ayo sa akong pagpanarbaho. Ug akong gipugngan ang akong kaugalingon nga mogasto aron gyod makatigom ko ug makapangandam ko alang unya sa among kasal.

Aron gyod makatigom ko og maayo nagsabot mi sa akong girlfriend nga dili lang una magdate aron dili mi makagasto ug dali ra mahuman ang pagtigom. Niuyon siya sa among sabot. Matud niya nga samtang nagtrabaho ko adto lang siya sa ilaha magpuyo ug motabang lang siya sa iyang mga ginikanan. Busa among giantos ang kamingaw sa usag-usa ug miabot gyod og 1 ka bulan nga wala mi magkita.

Apan perti na lang nakong kuganga, usa ka higayon nga ako siyang nakit-an. Nagsuroy-suroy siya ug dunay laing lalaki nga iyang gika-holding hands. Wala ko kasabot sa akong gibati, Tita, mora og gikumot ang akong dughan. Busa wala nako pakita pa kaniya, Tita. Unsa may akong buhaton, ako na lang ba siyang kalimtan? Palihug pasabta ko. Daghang salamat. -- James

* * *

Good day, James. Wala kita’y control sa mga hukom sa imong girlfriend. Anaa kaniya ang katungod sa pagpili kun kinsa ang iyang ikauban o ikuyog sa kinabuhi. Kun iya kang giilisan wala tay mahimo kay siya ra gyod ang nasayod kun nganong iya kining gibuhat.

Tinuod nga sakit kaayong hunahunaon nga luyo sa imong pagpangandam alang unta sa inyong kaminyoon iya pang nabuhat ang butang nga supak kaayo sa imong kabubut-on. Iyang gipili ang pagbudhi ug ang pagpangita og lain nga dapat unta siyang motabang kanimo ug mahatag og kadasig aron malipayon ka sa imong pagpaningkamot.

Apan sa laing bahin, salamat na lang nga iya kining gibuhat samtang wala ka pa mahinayak kaniya. Salamat na lang nga wala pa mo makasal ug nagpakita na siya sa tinuod niyang pagkatawo nga dili siya kasaligan. Kay unsaon na lang kun nakasal na mo ug duna nay mga anak unya mao pay igawas sa iyang kabuang.

Busa ayaw kaguol sa iyang gibuhat, kay siya ang matang sa babaye nga dili ka angayan mawili. Hinuon, padayon sa imong pagtigom kay alang kini sa babaye nga gitagana kanimo, alang sa imong kaugalingon ug sa umaabot nimong pamilya. -- Tita Salie