Joy to the world

Sulod sa dakong mall sa North Reclamation Area sa siyudad sa Sugbo, gilingaw ko ang akong kaugalingon sa pagsuroy. Window shopping! Pastilan, pagkadaghang tawo nga linga kaayo sa pinalitay.

Kay nagsingabot na ang pasko, hilabihang bisiha sa tanang nag-shopping ang sulod sa maong mall. Nagkapuliki ang mga salesgirl sa pag-abi-abi sa daghang mga customers nga namalit alang sa kagamitan sa pasko.

Nakapanglingo ko nga padayon nga naniid. Naglaway ko. Pagkakuwartahan man nila! Unya, nanuhotsuhot sa akong pandungog ang mga paskohanong awit nga gitugtog sa mga stereo sa sulod sa mall. Maoy nakapadasig sa akong pagpaminaw ang makahuloganong awit nga Joy To The World. Oo, angay lang gyud maglipay ang mga tawo, kay panahon na sab sa pagsaulog sa pagkatawo sa atong Ginoo. Oo, pasko na sab! Apan kalit lang usab nga gipulihan ang akong kaisipan sa alingugngog nga pangutana:

“Malipay ba kaha kaming mga kabos nga halos gani dili makakaon og katulo sa usa ka adlaw? Angay ba nga maglipay ang mga kabos nga mao man kanunay ang linupigan diha sa sabakan sa panahon? Nga ang mga kabos mao man unta ang angay nga unang talingahon ug hatagan og dinagkong pinaskohan, apan ang mga sapian naman hinuon ang palabihon ug maoy makadawat sa dinagkong pinaskohan...?”

Nahiabot  ko sa grocery section sa maong mall. Misamot nga dagko kaayo ang akong lad-ok sa laway nga niabog sa daghang nangomprahay sa nagkadaiyang groceries. Gihinok ko’g hinol ang bulsa sa akong karsones. Pastilan! Nagbasol na nuon ko ngano nga misulod pa man tawon ko dinhi sa mall, uy. Nakapasamot lang nuon ni sa akong pangindahay nga unta, ning paskoha, makatilaw ang akong pamilya og lamiang pagkaon alang sa noche buena. Apan unsaon?

Bug-at ang akong mga lakang nga migawas sa dakong mall. Daw gisulogsulog ko sa awit nga Joy To The World. Hahay, pagkapait ning usa  lang ka kargador sa piyer. Unya, giabagan lang tawon sa labandera kong asawa sa eskuwater nga gipuy-an ug maoy gibuhi sa bugtong namong anak nga si Ker.

Gihinol ko na usab ang bulsa sa akong karsones. Sus, tibuok usa ka gatos ka pesos lang tawon ang sulod niini. Badyeted na kini sa lima ka kilong NFA nga bugas humay ug mao nay akong gidulong ang suki kong tindahan sa North Reclamation Area nga usa sa mga NFA retail outlet sa siyudad aron  pagpalit og bugas.

“Bisan kabos, apan Joy to the world lang gihapon ning paskoha, basta himsog lang ang lawas uban sa pamilya...!” hilom kong nakatuaw sa akong kaugalingon. (Kataposan)