Dear Tita Salie,
Have a nice day, and how are you? Just call me Ms. Bait, 22 years of age and I am still single. Nagproblema gyod ko sa akong kasingkasing, Tita, ug manghinaot lang ko nga imo kong tambagan ug imo kong mapasabot sa angay nakong buhaton.
Duna ko’y hinigugma kaniadto, Tita, apan akong gibulagan dihang akong nasayran nga duna siya’y napabuntisan nga laing babaye. Sakit kaayo alang nako ang maong hitabo tungod kay love kaayo nako kining lalakiha. Sobra kaayo ang akong paghigugma kaniya, mahal nako siya labaw pa sa akong kaugalingon.
Human nako siya gibulagan, akong gi-delete ang iyang pangalan ug number sa akong cellphone apan bisan unsaon nako, Tita, dili man gyod siya ma-delete sa akong kasingkasing. Anaa lang gihapon siya sa akong kasingkasing. Ug hangtod karon padayon lang gihapon ang among communication kay kanunay man siya mo-text nako. Ug mosulti pa siya nga love lang gihapon ko niya ug wala siya mahigugma sa girl nga iyang nabuntisan.
Unsa may akong buhaton aron ako na siyang makalimtan? Love kaayo nako siya apan nakasala na man siya sa laing babaye. Palihog pasabta ko sa angay nakong buhaton. Thank you and God bless.
-- Ms. Bait
* * *
Hello, Ms. Bait,
Nakasabot ko sa imong gibati karon. Naanugnan ka sa inyong gugma nga inyong nasugdan. Ug anaa pa ang imong paglaum nga inyo kining ikapadayon tungod kay wala pa siya maminyo, hinuon duna na siya’y kabilinggan.
Tinuod nga gawasnon pa ang inyong gugma, puyde pa ninyo kining ipadayon kun inyong gustohon nga ipadayon. Nasayangan ka sa inyong gugma tungod sa kalit nga panghitabo, hinungdan nga naglisod ka pa pagtangtang kaniya diha sa imong dughan.
Apan ayaw kalipat pagtan-aw sa iyang batasan, ug sa iyang pagkatawo. Hunahunaa nga nakaya niyang magluib kanimo bisan kun uyab pa mo. Bisan pa man kun medyo sweet pa kaayo mo ug wala pay problema nga giatubang tungod kay wala pa kamoy pamilya. Unsa pa kaha kun minyo na mo ug anaa nay away-away mas dali pa niyang himoon ang pagluib kanimo.
Busa mas maayo nga samtang wala pa mo naminyo imo na nga nasayran ang tinuod niyang batasan. Imo na siyang nailhan nga dili diay siya kasaligan. Tungod kay wala ka niya ipaglaban sa mga tentasyon nga miabot sa iyang kinabuhi.
Dili siya ang lalaki nga angayan nimong hatagan sa imong gugma ug pagmahal. Busa ayaw na siya tubayi kun magsige pa siya og text kanimo aron inanay siyang mawala sa imong hunahuna. Ayaw na paminawa ang iyang “I love you” kanimo ug maoy hunahunaa nga duna siya’y tulobagon sa babaye nga iyang nasad-an.
–- Tita Salie