Broken Heart

Gula 3

Gipasaligan ni Japhet si Stephanie nga mahimo kaayo niya nga i-request sa tagdumala sa ospital nga siya maoy idistino nga special nurse kun mahitabo nga ipa-admit siya sa doktor.

“Nganong manginahanglan ka pa man og special nurse nga moatiman nimo Japhet nga duna man g’yuy nurse nga ma-assign sa mga private rooms?” matud ni Stephanie nga nahibulong.

Wala dayon makatubag si Japhet. Pagkataud-taud, iyang gipasabot si Stephanie nga gusto lang niya nga iyang kaila ang nurse nga maoy madistino kaniya. “Nindot man gud nga gwapa ang nurse nga moatiman kay madali ra nga mamaayo ang pasyente kay duna may inspirasyon,” matud ni Japhet.

Anam-anam nga nakabantay si Stephanie nga may tinguha si Japhet kaniya apan wala lang siya magpasabot.

“Basta oki ra nimo Step ha kun ikaw ang akong i-request nga special nurse?” giingnan ni Japhet si Stephanie. “Sige Step, moadto pa ko sa akong doktor,” matud ni Japhet dayong pig-it sa kamot sa nurse sa wala pa siya milakaw.

Gisundan siya pagtan-aw ni Stephanie samtang nagkalayo. Wala damha ni Stephanie nga mokalit paglingi si Japhet ug nakit-an siya nga nagsige’g lantaw kaniya.

Gipahiyoman ni Japhet si Stephanie.

Wala makasabut si Stephanie kun ngano nga siya man ang gusto nga mahimong special nurse ni Japhet. Gitug-an niya kini sa amiga niya nga si Sandra.

“Nakagusto g’yud na nimo si Japhet day…datu ra ba na. Buwag na kana siya sa iyang asawa,” matud ni Sandra. Nahasinta si Stephanie pagkasayod nga minyo na si Japhet.

“Maayo hinoon na day kay may kasinatian na sa mga palami sa kama ,” gikomedyahan ni Sandra ang iyang higalang nurse. Igo lang mipahiyom si Stephanie ug wala mokomentaryo sa gisulti sa iyang higala.

Nahimong pagya na sa mga kauban ni Stephanie ang ilang gitagna nga relasyon og ni Japhet. “Suod ra ba na sila si Mr. Bellones day, ang usa sa mga opisyal sa atong ospital,” matud sa laing kauban nila nga si Bebot. Taud-taud, mitawag si Japhet sa selpon ni Stephanie. “Wala magpalibak day, dia mitawag,” matud sa dalaga nga nagngisi.

“Step, ipa-admit g’yud ko sa doktor kay iyang obserbahan ang akong kahimtang. Kadtong akong giingon nimo ha?” matud ni Japhet. Pagka-udto, gipatawag si Stephanie sa ilang superbisor. “Dunay order ni boss Bellones, ikaw ang special nurse sa pasyente sa Room 906,” giingnan si Stephanie sa iyang superbisor.  (Sumpayan)