Broken Heart Gula 2

Gisundan ni Stephanie pagtan-aw si Japhet dihang migawas na kini sa ilang ward. Wala niya palandunga nga gihatagan ni Japhet og gibug-aton ang pagkadapat sa iyang dughan ngadto sa iyang buko-buko samtang nagpahigayon siya sa 2D Echo.

Gisugilon ni Stephanie ang nahitabo ngadto sa kauban niyang nurse nga si Sandra. “Kuyaw kun makita sa results Day nga mi-enlarge ang kasing-kasing adtong mao nga pasyente kay wala mahimutang sa pagkadapat sa imong dughan kaniya,” ni Sandra pa.

“Nangayo ra ba siya sa akong contact numbers day,” matud ni Stephanie nga nakapanglingo-lingo. Wala g’yud masayop si Stephanie kay mikurog ang iyang bulsa nga gibutangan sa iyang selpon nga gibutang sa vibration mode.

Gikuot niya ang selpon ug gitan-aw. Dunay text message nga iyang nadawat. “Wala ko masayop nga dinhi ko nagpa labtest sa inyong ospital bahala og mahal ang bayad kay gikaila nako ang cute nga nurse…ikaw.”

Nagkataw-anay ang maghigala nga Stephanie ug Sandra nga nakabasa sa maong text message. Sigurado si Stephanie nga gikan ni Japhet ang maong text message. Iya kini nga gi-reply ug gisiguro kun kang Japhet ba kini.

Nagbawos-bawos sila og mga text messages. Pagkaugma sa buntag, sayo na nga mireport si Stephanie sa iyang trabaho kay natagam siya nga hapit gayud siya ma-late kagahapon tungod sa grabeng traffic.

“Good morning Stephanie.” Napalingi si Stephanie dihang dunay mitimbaya kaniya gikan sa iyang luyo. Si Japhet diay. Gingisihan ni Stephanie si Japhet. “Uy, sayo ka man lagi,” ni Stephanie.

“Magkuha na ko sa results sa akong 2D Echo,” pasabot ni Japhet. Si Stephanie na mismo ang miukay sa nagtipun-og nga mga results nga diha sa usa ka folder. Gitawag ni Stephanie si Japhet aron papirmahon nga nakuha na niya ang iyang results.

Sa wala pa molakaw si Japhet, may gihunghong kini kang Stephanie. “Kun ipa-admit gani ko sa doktor, pwede ba nga ikaw ang akong i-request nga akong special nurse?” giingnan ni Japhet si Stephanie. Nakalitan si Stephanie sa iyang nadungog. Karon pa kini mahitabo nga may tawo nga mi-request og special nurse nga gikan sa laing department. Wala dayon makatingog si Stephanie.

“Please ha, i-request tika sa presidente ning inyong ospital kay kaila man mi. Gusto ko nga ikaw ang moatiman nako kay managhigala na man ta,” matud ni Japhet. (Sumpayan)