Madanglog nga kalibutan Gula 7

Nahigmata usab ang amahan ni Clarissa ug iyang nakit-an ang inahan ug anak nga nagsultihanay didto sa kusina mao nga miapil kini.

“Nakaamgo na si Clarissa sa nahimo niya nga sayop Sidro. Lauman na lang nato nga himoon niya kining leksyon ang nahitabo kaniya ug likayan na niya nga madakin-as siya pag-usab,” matud sa inahan ni Clarissa.

Nangayo’g pasaylo si Clarissa ngadto sa iyang amahan samtang nagbakho. Gipikpik ni nong Sidro ang buko-buko ni Clarissa aron pag-am-am kaniya. “Wala na kita’y mahimo pa kay anaa na kanang bata. Atimana na lang ang bata ug inig-able sa klase padayon sa imong pagtungha,” matud ni Sidro.

Gikan niadto, tabangan na si Clarissa sa iyang inahan sa pag-atiman sa bata. Migaan-gaan ang iyang gibati. Nahimong pinangga usab sa ginikanan ni Clarissa ang bata. Paspas ang pagtuyok sa panahon ug sa iyang pagbalik pag-eskwela nahuman ra ni Clarissa ang high school. Kapin na sa 18-anyos si Clarissa. Pagkanaug niya sa stage nga midawat sa diploma, may misugat kaniya sa hagdan og milamano kaniya. Wala dayon makaila si Clarissa kay nagsul-ob kini og mahalong sunglasses.

“Nalipay ko nga nalampos na g’yud nimo ang high school Clar,” mikulba ang dughan ni Clarissa nga nakahimungawong nga si Martin diay ang misugat kaniya. “Tuguti ko nga ako’y mobangka sa imong gradwasyon Clar. Maghuwat ko nimo sa sakyanan human sa program ha?” matud ni Martin.

 Igo lang mipahiyom si Clarissa ug mibalik sa iyang lingkoranan. Naglibog siya kun unsay buhaton. Dili niya kalimdan ang iyang kaugalingon nga may gusto pa siya ni Martin. Human sa program, miduol kang Clarissa ang iyang mga ginikanan.

“Ma, Pa, kadtong miduol nako kaganina mao kadto si Martin nga amahan sa akong anak. Tumanan nato siya Pa nga bangkahan ta niya og dinner,” ni Clarissa pa. Mikulismaot ang dagway ni nong Sidro.

Nagpaingon sa ilang nahimutangan si Martin. “Paamina ko Pa, Ma. Adto na ta sa sakyanan,” ni Martin pa. Nasayran sa mga ginikanan ni Clarissa nga maayo diay’ng pagkabutang ang amahan sa ilang apo.

Gisaysay ni Martin nga human sa gradwasyon, gipalarga siya sa iyang mga ginikanan kay nahadlok nga dagmalan siya sa mga ginikanan ni Clarissa. “Wala ko’y nahimo kay menor-de-edad pa ko, apan karon nga husto na ko sa edad, gusto ko nga pakaslan na nako si Clarissa,” matud ni Martin.

“Wala kami pagsupak kun magpakasal kamo ug ang akong anak Martin, apan huna-hunaa nga mga bata pa kamo,” ni nong Sidro pa. Gipakasal g’yud tinuod sa ilang mga ginikanan sila si Clarissa ug Martin. “Abi nako og dili na ako makabangon sa akong pagkadakin-as sa madanglog nga kalibutan,” matud ni Clarissa samtang migakus sa iyang bana. (Kataposan)