Goodbye is not Forever

Gula 33

Apan wala lang niya kini hatagi’g gibug-aton. Natural lang kini sa usa ka lalaki; dili ngil-ad hunahunaon. Ang ngil-ad palandongon kun ang babaye nga sama kaniya ang mag-una-una’g kupay sa lapok. Mao nga nag-amping siya nga dili mamansahan. Usa siya ka nurse nga nag-amping sa iyang kaputli. Ug kini iyang gitugyan ngadto kang Albert nga mao nay iyang kuyogan ngadto sa altar sa kaminyoon.

Mipiyong si Josheba. Buot siyang magdamgo. Buot niyang masinati bisan sa damgo lang kadtong matahom nga mga anib sa kasaysayan sa gugma nila ni Albert.

Pagbuka ni Josheba sa iyang mga mata, wala niya hisayri kun unsa kadugay siya nga nagpabilin sa maong kahimtang. Miliraw siya. Gilugakan ang seat belt nga nagbalikos sa iyang lawas ug mitindog. Hinay nga mipaingon sa comfort room sa ayroplano. Mitubag sa sugo sa lawas.

Sukad sa paglarga ni Josheba sa Canada, gibati ni Albert ang kahaw-ang sa iyang kasingkasing. Mora’g gibag-ohan siya sa kinabuhi nga nalayo kaniya ang hinigugma. Gibati niya ang tumang kamingaw. Gimingaw siya pag-ayo kang Josheba. Ug ang picture niini nga anaa sa iyang pitaka mao ray kanunay niyang kasumbongan sa iyang kamingaw sa hinigugma. -- Sumpayan pa