Dangtag pila ka gutlo, milupad na ang ayroplano nga gisakyan ni Josheba. Wala gayod mobiya sila si Albert sa ilang nahimutangan samtang makita pa nila ang abyon nga gisakyan sa dalaga.
Samtang nagpanaw ang ayroplano, si Albert maoy nanumbalay sa kaisipan ni Josheba. Tugob sa kadasig ang iyang kalag. Sayag kaayo ang iyang panagway. Daw mga aninipot ang iyang mga mata. Nagpangidlap kini. Mora’g giyungyongan sa mga bituon ang iyang katahom.
Sa kahiladman sa iyang kasingkasing nagsugwak ang paglaom. Sa iyang handurawan mopasunding matag karon ug unya ang kaambongan ni Albert. Nahinumdom siya sa ilang gikasabotan -- nga magpakasal na sila kun makatigom na sila’g kuwarta. Hamili ug dalaygon ang iyang mga pangandoy sa ila unyang kaminyoon ni Albert. Daghan siya’g mga plano alang sa ilang kaayohan. Kini maoy hinungdan sa iyang pagpanimpalad sa Canada.
Kinahanglan nga pangandaman gayod nila ni Albert ang umaabot nilang kaminyoon. Gusto niya nga makatambong ang ilang mga ginikanan, mga igsuon, mga higala ug ubang mga kaila inig-abot unya sa maong adlaw nga hiusahan sila atubangan sa altar sa Ginoo ug makaambit sila sa kalipay nga ilang pagabation atol sa adlaw sa kasal. -- Sumpayan pa