24-Oras

Gula 5

Una nga gikanta nila ni Oscar ug Divina ang duet song nga Please Be Careful With My Heart. Memoryado diay ni Oscar ang mga pulong sa maong awit mao nga wala na siya motan-aw pa sa screen ug hinoon didto na siya mitutok ni Divina samtang nagpadayon sa pagkanta.

Pwerte nga nakapakpak sa ubang customers kay nahimuot sila sa ilang nakita nga maayo kaayo nga pagka kanta nila ni Divina ug Oscar ang Please be Careful with my Heart. Dayon misunod ang You Needed Me nga gi-request ni Oscar nga kantahon ni Divina. Wala masayop si Oscar kay nindot kaayo mokanta si Divina. Misuliyaw ang katawhan sa kahinangop. “More! More! More!” naninggit ang mga customer nga miawhag nga pakantahon pa nila si Divina.

Ingon sa nauwaw apan mipahiyom si Divina sa komplimento kaniya sa mga customer. Apan wala kawanga ni Divina ang hangyo kaniya. Iyang gipa-encode ang popular kaayo nga kanta ni Whitney Houston nga Saving All My Love for You.

“I would like to dedicate this song to all of you but most of all to my friend, Oscar. I’m happy to be here with you tonight,” ni Divina pa sa dayon niyang kanta. Nakita ni Divina sa panagway sa mga customer nga nahimuot kaayo sila nga naminaw sa iyang pag-awit. Makabungog ang pakpak nga iyang naangkon. Duna gani pipila sa mga customer nga miduol g’yud sa lamesa nila ni Divina ug Oscar og milamano sa dalaga.

Nagpahiyom si Oscar nga mitutok ni Divina. Wala siya magtoo nga ingon niini mokanta si Divina. Apan ang labing nindot alang kang Oscar mao ang dedication ni Divina sa dayon niini nga pagkanta niya nga gipahinungod kaniya ang Saving All my Love for You.

“Kanindot sa kahulogan sa maong awit Div kun matinuod,” giingnan ni Oscar ang dalaga. “Bitaw uy, mga meaningful man kaayo ang akong mga gikanta,” dali nga tubag ni Divina kang Oscar.

“Motuo ka kaha Div kun ingnon ko ikaw nga na in-love ko nimo?”matud ni Oscar samtang gigunitan niya ang kamot sa dalaga. Gipasabot ni Oscar si Divina nga mahimong dili siya katuohan kay bag-o pa sila nga nagkaila, apan dili niya kalimdan ang iyang kaugalingon sa tinuod niya nga gibati.

Nakabantay si Oscar nga miginhawa og lawom si Divina. Wala dayon kini makatingog sa pagpanguyab ni Oscar kaniya sulod sa video karaoke bar. Apan nakita ni Oscar nga nagpabiling nagpahiyom si Divina bisan og wala motubag kaniya. (Sumpayan)