Kudkoran

Nagpahiyom si Nilo nga nangayo’g katahuran kang Emma nga nanilhig sa natad sa ilang balay ning udtoha. Miungot dayon ang panan-aw sa dalaga sa gibitbit sa ulitawo. “Maayong udto, Em! Ania na sab ko uban ning lahing lubing binuntan nga gibuak nang daan aron makakudkud sa imong kudkoran...!” ni Nilo nga mikihat sa katalirungan ug silingang dalaga sa ilang baryo, nga klasmeyt niya sa 4th year high school.

Gipakita dayon sa ulitawo ang giakub nga bagol sa lahing lubi nga kudkurunon.

“Unsa may tunoan na sab nimo ning Domingoha, Nil...?”

“Magduldog ko’g kamoteng bagon, Em...!”

“Kalami sa dinuldog nga kamoteng bagon, Nil! Mora sab og  binignit!”

“Mao lagi nga mokudkod na sab ko’s inyong kudkuran, Em...!”

“Aw, saka lang sa kusina, Nil! Tua man didto ang kudkoran...!”

Ginuntan sa pagtan-aw ni Emma si Nilo nga lagsik kaayong misaka sa kusina. Nakamatikod ang dalaga, nga iatol gayud ni Nilo ang pagkudkod og lubi matag Domingo, kay ang iyang papa Tildo ug mama Pia atua sa tiyanggihan sa ilang baryo aron mangumpra og sinemanang kunsumo. Hilom nga nangulitawo kaniya si Nilo, bisan didto sa library sa ilang eskuylahan.

“Sus, sayod kong lansis lang ning imong kudkod-kudkod og lubi, matag Domingo sa udto, Nil..!” ni Emma nga misaka sa kusina ug naabtan niyang paspas nga nagkudkod ang ulitawo, samtang malipayong nagkabayo sa lawas sa kudkoran nga giporma og kabayokabayo.

“Ganahan naman god kong mokaon og tinunoan nga pagkaon, Em! Gawas pa, makahigayon sab ko sa pagpakigsulti nimo kun magkudkod ko’g lubi matag Domingo sa udto, kay atua man sa tiyanggihan ang imong papa ug mama. Hibawo kong masuko sila nako kun mangulitawo ko nimo, kay bugtong kang anak. Parehas ta nga mga bugtong anak, Em...!”

“Syempre! Moggradwar pa god tas hayskol, Nil. Gusto man god nilang papa ug mama nga makatapos tag eskuyla sa kolehiyo...!”

“Himuon tang inspirasyon ang atong gugma, Em! Isaad ta nga mopadayon gyud ta’g eskuyla sa kolehiyo, kay mao say gidasig nilang papa Narding ug mama Lagring nga patapuson ko’g eskuyla sa kolehiyo...!”

“Marukoy gyud ka, Nil! Lansis-lansis lang gyud ka’g kudkod-kudkod og lubi matag Domingo aron makapangulitawo ka nako...!”

“Oo, Em! Giisip tika nga mao ang akong  kudkoran sa kinabuhi...!”

“Ngeeee! Aw, kitang duha maoy isipon tang mga kudkoran, Nil. Ug kanunay tang pahaiton ang suwab niini, tungod ug alang sa atong gugma, aron makab-ot ta ang kalampusan ugma damlag...!”

Mitindog si Nilo gikan sa gikabay-an niyang kudkoran. Gigakos niya si Emma. Nagginaksanay sila sa kusina. Nagkasinabtanay ang batan-on pa nilang mga kasingkasing nga maoy gihimong panag-ingnan ang kudkoran, diha sa way paghupas nga kahait sa suwab niini. (Kataposan)