24-Oras - Gula 3

Samtang nangaon sila si Oscar ug Divina sa usa ka restaurant nga duol sa Marco Polo Plaza Hotel, matag karon ug unya molantaw sila sa downtown Cebu City nga tugob sa kamabulokon panahon sa kagabhion.

Human sa ilang panihapon giawhag ni Oscar si Divina nga muinom sila og red wine. “Wala pa g’yud ko makasuway og inum anang red wine, dili kaha ko mahubog ana?” ingon sa nagduha-duha si Divina.

“Dili ka mahubog sa red wine Div kay usa ka botelya ra ‘sab ang atong orderon,” matud ni Oscar. Gitutokan ni Oscar si Divina nga ingon sa mikulismaot ang panagway sa unang pagdimdim niini sa red wine.

“Nganong wala ka man mangita’g makauban nimo pag-anhi sa Sugbo Div?” gipangutana ni Oscar ang dalaga. Nahuna-huna ni Oscar nga dili man suheto si Divina sa Sugbo apan wala siya mangita’g makauban. Gipasabut siya ni Divina nga wala mudayon sa pag-anhi sa Sugbo ang suod niyang amiga mao nga nag-inusara na lang siya sa pagsakay sa barko. Sa City Hall sa Surigao City nagtrabaho ang amahan ni Divina.

Gani gikontak man si Divina sa iyang amahan atol sa ilang pagpangaon ug nangutana sa iyang sitwasyon dinhi sa dakbayan. Kamaguwangan nga anak si Divina ug hilig kini og mga adventure nga mulakaw nga mag-inusara.

“Maayo gani kay gikaila ko ikaw Oscar kay kun wala ka pa, tingali mag-inusara lang ko nga magsuroy-suroy dinhi sa inyong siyudad,” ni Divina pa nga nagpahiyom.

Dihang nahurot na nila’g inum ang usa ka botelya nga red wine. “Gikan dinhi, asa pa ang gusto nimo nga atong adtoan, let’s enjoy the night,” giingnan ni Oscar si Divina.

“Ikaw ang bahala kay wala ko masuheto dinhi sa inyong siyudad,” ni Divina pa nga mitutok kang Oscar. Ingon sa misamot kagwapa si Divina nga daw mipuwa ang iyang mga aping tungod sa iyang nainom nga red wine.

Daw naglaway si Oscar nga nagtan-aw kang Divina, ilabi na sa iyang mga ngabil nga maayo kaayo nga pagkaporma. Nasuta usab ni Oscar nga bawog kaayo ang mga pilok ni Divina nga nakapadugang sa iyang kaanyag. Angayan usab si Divina sa iyang buhok nga kutob sa iyang abaga.

Nakasabut si Divina nga may kaibog kaniya si Oscar. Kaganina ra siya nga nakabantay nga nagsige’g tutok kaniya si Oscar. Nabatyagan usab ni Divina nga gaan ang iyang pagbati kang Oscar.

“Mag-disco ta Div,” giingnan ni Oscar ang iyang amiga. Dali kaayo nga nakatangdo si Divina nga mag-disco sila gikan sa restaurant. (Sumpayan)