24-Oras

Gula 2

Gipasaligan ni Oscar ang amiga niya nga taga Surigao nga tabangan kini pagpangita og lodging house nga iyang kaestahan inighuman nila’g tambong sa misa-pasalamat alang ni San Pedro Calungsod.

“Pwede man mosakay ko dayon pagbalik sa barko karong gabii pero gusto pa ako nga mosuroy usa dinhi sa inyong dakbayan ug ugma na ko sa gabii mobalik sa Surigao,” giingnan ni Divina si Oscar.

Wala na kaayo makapaduol sa templete sila si Oscar ug Divina aron pagpaminaw sa misa kay pwerteng daghana na sa mga tawo nga nagpahimutang nang daan atubangan sa altar.

Nasayran ni Oscar nga usa diay ka sakop si Divina sa nabantug na kaayo nga Marajao-Karajao nga tig-apilan sa Sinulog dinhi sa dakbayan sa Sugbo atul sa kapistahan ni Santo Niño.

“Matag anhi gud namo sa Cebu nga moapil sa Sinulog dili mi makalugar pagsuroy kay mamalik man dayon mi sa Surigao nga tibuok grupo. Ugma matuman na g’yud nako ang akong pangandoy nga makasuroy dinhi sa inyong dapit,” ni Divina pa.

“Sige, tayming kaayo kay Sabado man ugma wala mi trabaho ug pwede tika ubanan kun gusto ka aron duna kay tour guide,” matud ni Oscar nga nagngisi.

Mihunong usa pagsultihanay sila si Oscar ug Divina kay naminaw sila sa wali ni Cebu Archbishop emeritus Ricardo Cardinal Vidal. Human sa misa, giawhag ni Oscar si Divina nga mosuroy sila daplin sa dagat sa SRP.

“Hala kanindot diay tan-awon sa siyudad no panahon sa gabii,” nakatuaw si Divina nga milantaw sa bukid. “Mas nindot ang talan-awon kun adto ka sa ibabaw manukad paglantaw paingon sa kinaubsan,” giingnan ni Oscar si Divina.

Misugyot si Oscar kang Divina nga adto sila mag-dinner sa usa ka restaurant tupad sa Marco Polo Plaza Hotel. Gitudlo ni Oscar ang dapit nga ilang adtoan ug ingon sa naghinam-hinam si Oscar nga makaadto sa maong lugar.

Gikan sa SRP nanakay sila si Oscar ug Divina sa usa ka bus nga mihatud kanila balik sa siyudad. Gidala ni Oscar si Divina sa usa ka lodging house sa dalan D. Jakosalem aron adto kini moestar.

Gibilin ni Divina ang iyang bag sa kwarto. Migawas sila sa lodging house. Nanakay og taksi paingon sa restaurant nga nahimutang duol sa Marco Polo Hotel nga nag-umbaw sa dakbayan.

“Kanindot diay dinhi no?,” nalipay kaayo si Divina nga nagsud-ong sa tibuok dakbayan dihang didto na sila sa restaurant. Gitudlo ni Oscar kang Divina ang dapit sa SRP nga didto sila kaganina. Nakasabot si Oscar nga malipayon kaayo si Divina sa ilang panag-uban. (Sumpayan)