Goodbye is not Forever Gula 20
“Unsa bay imong gihinuktokan?” matud na usab sa mama ni Albert. “May problema ka ba?”
“W-wa man, Ma,” miingon siya. “Nagpahangin lang ko. Balik na lang sa imong kuwarto. Mosunod ra ko karon taudtaod.”
“Ayaw pagdugay diha kay lawom nang gabii,” miingon ang inahan dayong talikod ug misulod kini pagbalik sa kuwarto niini.
Nahabilin si Albert nga nagpanglingo samtang milantaw ngadto sa gawas. Nabuhian niya ang usa ka halawom nga panghupaw. Unya dihay nasipong sa iyang hunahuna. Kun gikinahanglan gayod, matud niya sa kaugalingon, buhaton niya ang gisugyot ni Eking. Bahala na!
Mitindog siya human mapupo ang maong hukom. Diha nay kalinaw ang iyang hunahuna. Misulod siya sa iyang kuwarto ug mihigda. Ug wala madugay nahikatulog siya.
Nianang gabii adlaw’ng Martes, dihang nigawas na sila sa ilang gitrabahoan kay panggabii lagi sila, si Albert mihangyo kang Josheba sa pagpakigpanuroy. Wala mobalibad ang dalaga nga gikahinangop usab pag-ayo sa ulitawo. Giplansa na niya ang iyang mga laraw. Karon kun makakita siya’g higayon, buhaton na niya ang naumol nga plano sa iyang hunahuna.
Didto sila mosangko sa Ocean Pearl Beach Resort sa Lapulapu City. Mao kini ang naandang dapit diin sila magpalabay sa mga oras sa kalaay. -- Sumpayan pa
- Latest
