Police Lover Gula 4

Miutong…gipugngan ni Romeo ang iyang ginhawa dihang nag-abut na ang ilang masig ka mga ngabil ni Grace. Lalim nga walay sama ang iyang gibati dihang gisupsop niya ang lumoy ug tam-is kaayo nga mga ngabil sa gwapa nga polis.

Wala gayud magdahum si Romeo nga moabut kaniya kining maong higayon. Wala magdahum si Romeo nga may pagtan-aw usab diay kaniya si Grace. Kalit nga misakdop sa huna-huna ni Romeo nga nakahukom na si Grace nga buwagan na sa hingpit ang iyang bana.

Misukol si Grace sa pagpakig-parayganay ni Romeo. “Basin og imo lang ko nga binuangan Rom ha? Kuyawan baya ko kay wala pa ma-annul ang among kasal ug sa akong bana, basin og may maka-report ug makasohan unya ko.”

Giam-aman ni Romeo ang gwapa nga polis. Naglami gayud ang ilang pagparayganay hangtud nga wala na mapugngi ni Romeo nga kiriwan na kaayo ang iyang mga kamot nga nagpanghiram sa kalawasan ni Grace.

Nasabut usab ni Romeo nga gimingaw na si Grace og mga parayeg sa usa ka lalaki. Nakatug-an si Grace kang Romeo kaganina nga dugay nang higayon nga nagkatupad sila’g higda ug ang iyang bana sa wala pa sila magkabuwag.

Gipasagdan ra ni Grace si Romeo nga nagpanghiram sa iyang kalawasan. Wala na sila mahinultol sa salida nga ilang gitan-aw. Misamot ang kaagresibo ni Romeo nga miparayeg kang Grace tungod kay napasiplatan niya sa tilon nga kissing scene ang bahin sa salida.

“Romeo, Rom, katam-is nimo modala og parayeg,” ni Grace pa sa paraygon kaayo nga tingog. Ang pamahayag ni Grace maoy nakapasamot ni Romeo sa pagka-agresibo. Iyang gipakaligo og daghan pa nga mga hawok si Grace.

Wala na sila makabantay nga nahuman na diay ang salida nga ilang gitan-aw. “Nakasabot ka ba sa salida nga atong gitan-aw?” giingnan ni Romeo si Grace. “Wala. Ikaw, nakasabot ka?” bawos pangutana ni Grace nga nagngisi.

Taud-taud, gipasiga ang suga samtang nagpaabot sa pagpasundayag pag-usab. Wala na sila magkaparayganay si Romeo ug Grace. “Grabeha nimo modala og romansa Rom uy. Mora man ko’g mawala sa kalibotan kadiyot,” ni Grace pa.

“Samot na kun anaa ta sa kama, dili ka gayud magmahay,” dali nga tubag ni Romeo. Gipaduol ni Romeo ang iyang ba-ba sa dunggan ni Grace.

“Manulod unya ta’g lugar nga walay makabalda kanato aron ikapamatuod ko nimo ang akong giingon nga dili ka magmahay kay tagbawon ko ikaw sa kalipay,” ni Romeo pa. Gikusi ni Grace si Romeo sa kilid kay nakasabot siya kun unsay ipasabot sa iyang bag-ong boyfriend. (Sumpayan)