Police Lover - Gula 2

“Nakasuroy ka lagi karon Grace, walay duty?” gisukna ni Romeo ang gwapa nga polis nga nag-inusara lang nga miduol kaniya. “Off ko karon Rom mao nga nagsuroy-suroy ko tambal sa tibuok semana nga kakapoy,” matud ni Grace.

Milingi-lingi si Romeo sa palibot apan wala siya’y nakita nga kauban ni Grace. “Ikaw ra ba usa Grace?” iyang gisiguro kun may kauban pa ang polis. “Ako ra usa… gusto lagi unta ko motan-aw og sine apan walay kauban,” ni Grace pa nga mipahiyom.

“Imbitahon ko usa ka og snack Grace kay pareho man ta, wala ‘sab ko’y kauban. Suroy-suroy ra ‘sab ning ako Grace,” matud ni Romeo nga migunit sa abaga sa gwapa nga polis.

Samtang nangaon sila, misugyot si Grace nga sila na lang ang mag-uban sa pagpanan-aw og sine. Wala g’yud magduha-duha sa pagtangdo si Romeo kay alang kaniya talagsaon ra kaayo kini nga ang babaye maoy mohagad kaniya pagpanan-aw og sine.

“Sugot kaayo ko Grace, apan mora’g mataha ko nimo kay usa ra ba ikaw ka polis,” giingnan ni Romeo si Grace. “Kalimti usa nga polis ko Rom. Wala man ko magsul-ob og uniporme,” matud ni Grace nga nagngisi.

Tuod, human nila pagpangaon, mipaingon sila sa sinehan diin nagsalida sa pelikula nga gusto’ng tan-awon ni Grace. “Uy, love story man diay kining imong tan-awon Grace,” matud ni Romeo samtang nagbarug na sila atubangan sa tiketera.

Mibulontaryo si Romeo nga maoy mobayad ug gikahinangop kaayo kini ni Grace. Pagsulod nila sa sinehan, nabag-ohan ang ilang mga mata. Hilabihang ngioba sa palibot ug ang kahayag nga midan-ag mao ra ang gikan sa tilon.

Migunit sa bukton ni Romeo si Grace samtang hinay ang ilang mga lakang ug gibuka pag-ayo ang ilang mga mata aron makakita og kalingkuran. Nakasigpat sila og mga bakante nga lingkoranan dapit sa daplin ug didto sila milingkud.

Si Grace maoy gipalingkud ni Romeo didto sa daplin sa bungbong sa sinehan. Pipila ka gutlo nga wala sila’y timik. Taud-taud, nakahukom si Romeo nga buk-on ang kahilom. “Wala g’yud ko magdahum Grace nga mahitabo kining kalit nato nga deyt karong hapona,” ni Romeo pa.

“Hasta ‘sab ko Rom. Pero dili ‘sab ni mahitabo kun dili pa ko daku og pagsalig nimo,” dali nga tubag ni Grace.

Dunay pagduda si Romeo nga wala nay maayong pagtinagdanay si Grace ug ang iyang bana ug nakahuna-huna siya nga iya kining tinoon. “Nananghid ka ba sa imong bana nga motan-aw karon og sine Grace?”

“Wala uy. Ang tinuod, nagbuwag na man mi Rom,” matud ni Grace. (Sumpayan)