Australiano

Dear Tita Salie,

A good day to you, Tita, and I hope that you are in good health. Permi gyod ko mobasa sa imong Column kay ako kining magamit  isip giya sa akong kinabuhi. Tungod kay dili gyod kalikayan nga dunay daghang mga problema ug pagsulay nga buot motumpag kanato.

Tagoa lang ko sa ngalan nga Mr. E., 53 years old nako ug usa ka minyo. Nagproblema gyod ko niining akong asawa kay naka-chat siya og Australiano. Matag anhi sa Australiano dinhi sa Pilipinas adtoon gyod kini sa akong asawa didto sa hotel nga giabtan.

Karong last nga anhi sa Australiano, Tita Salie, niabot og 4 ka semana  akong asawa didto sa hotel. Nitipon siya og puyo sa iyang ka-chat ug gibiyaan lang mi sa among balay.

Sa una mora og makaya nako ang maong sitwasyon. Apan karon nagkaanam na man og ka bug-at ang akong dughan ug maglagot na man ko nga  maghunahuna sa akong asawa kay mora na man og iya kong giabusaran sa akong kaayo ngadto kaniya. Unsa may akong buhaton, Tita, ako na lang kaha siyang bulagan? Palihog Pasabta ko, Tita. Thank you very much and more power.

-- Mr. E

* * *

Dear Mr. E.,

Dili nako makuha ang sitwasyon nganong niabot niini ka problemado. Dili ko kasabot kun nganong nakapatuyang ang imong asawa sa iyang pagpakig-chat og lalaki sa internet. Wala ba gyod ka masayod niini sa sinugdan pa lamang? Ug sa matag-anhi sa Australiano ug moadto gyod siya wala ka ba moreklamo? Ug karon ka na lang niangal nga naabtan na siya  og 4 ka semana ngadto sa hotel nga giabtan sa Australiano. Or may be nagtrabaho ka sa medyo layolayo nga lugar ug wala gyod nimo na-monitor ang gikalingawan sa imong asawa.

Daghan na gyod kaayong badlongon karon panahona. Daghan nang nabuang sa text-text ug chat sa internet. Ug mas pait pa gyod kay bisan ang atong mga minyo na nga babaye ug lalaki niapil niining maong mga kabuang.

Mas maayo seguro kun imong tan-awon ang inyong relasyon isip magtiayon. Hunahunaa ninyo ug tan-awa ang inyong giagian kun nganong nisangko kamo sa maong sitwasyon. Tan-awa usab ang imong kaugalingon kay tingali kun pulos na lang ka pangita og kwarta ug imo na nga nakalimtan nga aduna kay obligasyon ni Misis. O tingali kun wala na nimo matagad si Misis ug mao nga nagpabadlong siya kanimo aron imong tagdon.

Estoryahi ninyo pag-ayo ang maong problema. Busa huwata siya nga mopauli. Husaya ang mga angay tukion. Mas maayo seguro kun inyong hatagan og chance ang inyong tagsa-tagsa ka kaugalingon aron maluwas ang inyong relasyon ug kaminyoon.

-- Tita Salie