Lusong nga makabuak og alho

Way hunong ang pagpanibug-ok sa singot nga bugnaw, ang gibati karon ni Tinong nga naghunahuna nga karong gabii ... inigkahuman sa ilang kasal ni Ines, seguro na man gayod nga itugyan ang tanan niyang pagkababaye ... aron gimdimon sa tumang katagbawan ang dugay na niyang gipangandoy nga makatilaw siya sa maong babaye nga iyang gipaka-bathala ning ilang dapit sa balangay sa Tinubdan.

“Sure ka ba gayod kanako Tinong, nga sa akong kahimtang nga makaupat na mabiyuda ... mangasawa kanako?” sagol pisil ni Ines sa iyang tudlo.

“Sure kaayo Ines!” mubo niyang tubag.

Ang tinuod ... dihay iyang pagduhaduha nga mopadayon sa pagpakasal ni Ines? Simbako tuod siya ang mahimong ikalima nga mabana ni Ines? Dili na ra ba matali sa iyang tudlo ang iyang nadunggan sa ilang mga silingan diin kini magkanayon:

“Seguro gayod nga mameligro ang imong kinabuhi Tinong!”

Sa sinugdan ingon sa naamang sa makadiyot si Tinong. Nabalaka siya sa gipamulong sa usa niya ka silingan. Ngano kaha? Aduna ba kahay mananakod nga sakit si Ines nga angay likayan? Hangtod nga nakapangutana si Tinong.

“Ngano man diay nga mameligro ang akong kinabuhi kun akong minyoan si Ines?” nabundak og kalit ang iyang tingog.

“Tungod sa talagsaong matang sa iyang pagka-babaye nga makapo og bana ... hangtod nga mamatay!” daling tubag sa iyang silingan. “Nganong mamatay man?  Iya bang hiloan?” luhag nga nagpakisayod si Tinong.

“Gumikan sa kagahi nga dutlan sa iyang lusong   ...  mabuak gayod ang alho sa lalaki nga iyang mabana kutob sa iyang kaminyoan!” pintok nga mitubag kaniya. “Relaks ka lang Tinong, sa imong buhaton kanako ... sa dili pa natong duha sugdan ang binuakay sa pakwan!” kalit lang nahagtos ang kalawom sa paghanduraw ni Tinong sa dihang kalit siyang gikupogan ni Ines og gakos.

Ambot unsang hitaboa, nakahunahuna man og inantigo nga diskarte si Tinong ug mao na lamang iyang nabatian nga midangoyngoy og hilak si Ines nga nagkanayon.

“Pastilan Tinong ... unsa kining hitaboa .. nga ako man hinuon ang mamatay sa kaluya?

Igo lamang mikagik-ik og katawa si Tinong nga nadala sa tama ang iyang asawa. (Kataposan)